ក្នុងវិស័យសិល្ប:គេកត់សម្គាល់ថា តារាចម្រៀងសំឡេងគ្រលួច លោក សុផល ទីទី ទទួលបានជោគជ័យច្រើន ដោយក្រៅពីឧស្សាហ៍ឃើញលោកឡើងឆាកទូរទស្សន៍ និងបង្ហាញខ្លួនក្នុងវេទិកាពិព័រណ៌តូចធំនាពេលចុងក្រោយ លោកក៏ទើបត្រលប់មកពីប្រទេសអូស្រ្តាលី ក្នុងគម្រោងចេញសម្ដែងប៉ុណ្ណោះ ។ ប៉ុន្តែ កាលពីអតីតកាលលោកថាខ្លួន គ្រាន់តែជាអ្នករត់តុមួយរូប ដែលប្ដូរភោជនីយដ្ឋានមួយទៅភោជនីដ្ឋានមួយទៀត ក្នុងអាជីពជាអ្នកលើកម្ហូបនប៉ុណ្ណោះ ។

រំលឹកដល់ជីវិតជូរចត់នេះ តារាចម្រៀងលោកសុផល ទីទី និយាយថាលោកមិនដែលជឿភ្នែកថា លោកបានក្លាយជាតារាចម្រៀង ដែលមានការទទួលស្គាល់នោះទេ ដោយសារតែជីវភាពកាលពីអតីតកាល គឺមានភាពលំបាកខ្លាំង ហើយស្ថានភាពជាអ្នករត់តុ នៅអំឡុងពេលមុន គឺមិនមានឱកាសសូម្បីតែឲ្យ លោកមានសំលៀកបំពាក់សមរម្យ ។ លោកថាជីវិតពិតជាខុសពីការទិទាន ដោយសារតែលោកដ្បិតថា មានអាជីពជាអ្នករត់តុ ប៉ុន្តែរមែងហ្វឹកហាត់សំឡេង តាមសំនៀងដើមរបស់បទនេះ តាមបទនោះ ហើយទីបំផុតឱកាសកាន់ក្បាលមេក្រូលើឆាក ដែលលោកធ្លាប់តែស្រម៉ៃក៏បានកើតឡើង។ លោកនិយាយថា“បើក្រឡេកទៅអតីតកាល ខ្ញុំថាមិនមែនខ្ញុំ ដោយប៉ុន្មានថ្ងៃមុនខ្ញុំនៅរត់តុសោះ ស្រាប់តែពេលនេះមានឱកាសឡើងឆាក និងបានជិះដល់ទៅយន្តហោះទៅច្រៀង នៅក្រៅប្រទេសក្នុងនាមជាតារាអាជីព!» ។

លោកថាកេរ្តិ៍ឈ្មោះចាប់ផ្ដើម រះត្រដែតបន្ទាប់ពីមានបណ្ដាទូទស្សន៍អញ្ជើញឡើងឆាក ហើយក៏មានម្ចាស់កម្មវិធីប្រគំតន្ត្រី នៅតាមសណ្ឋាគារធំៗ និងតាមបណ្ដារខេត្តជាដើមអញ្ជើញឲ្យលោកឡើងច្រៀង។ លោកទើបតែបានត្រលប់មកពីការសម្ដែង នៅប្រទេសអូស្ត្រាលី មុននេះប៉ុណ្ណោះ ដោយនៅប៉ុន្មានសប្ដាហ៍ខាងមុខ លោកក៏នឹងហោះហើរទៅច្រៀង នៅប្រទេសកាដាណាជាថ្មីម្ដងទៀត សម្រាប់ទីផ្សារក្រៅប្រទេស។ តារាចម្រៀងដែលមានទឹកដមសំឡេង បានពីរោះទាំងប្រភេទបទពីដើម និងយុវវ័យរូបនេះ បានអះអាងថាលោកត្រូវបាន ទទួលស្គាល់ទេពកោសល្យសិល្ប: ដោយសារតែលោកចេះស្មូត្រ និងអាចច្រៀងបទបរទេស ហើយអាចកំប្លុកកំប្លែងបាន ។ លោកទីទី បន្តថា ជីវិតទម្រាំស្គាល់ពាក្យថាជោគជ័យ គឺមិនខុសពីត្រូវដើរជាន់បន្លានោះទេ ដោយក្នុងពេលមុនលោកក៏ចង់ចុះចាញ់ ហើយឈប់តស៊ូម្ដងៗផងដែរ។

លោក សុផល ទីទី បញ្ជាក់ថាគ្រប់ពេលឡើងឆាក លោកមិនដែលលាក់ប្រវត្តិរបស់ខ្លួននោះទេ ហើយក៏យល់ឃើញថាអ្នកដៀលថា លោកគឺក្មេងរត់តុ ក៏ជាដាស់តឿនកុំឲ្យលោកភ្លេចកំណើតដើមនោះដែរ បើទោះជាអ្នកខ្លះហាក់នៅបន្តមាក់ងាយពីអតីតកាលរបស់ខ្លួន ។ លោកមានគម្រោងឡើងឆាក និងអាចមានបទចម្រៀងផ្ទាល់ខ្លួន បន្ទាប់ពីលោកត្រលប់ពីការសម្ដែងនៅ ប្រទេសកាណាដានាពេលខាងមុខ ៕