តាំងពីរសៀលថ្ងៃទី១០ មករា តារាសម្ដែងនាងពេជ្រ អាវីហ្សា បានឡើងទៅដល់ប្រទេសថៃហើយ ដោយគម្រោងរបស់នាងមិនត្រឹមតែដើម្បីដើរផ្សារ និងទៅលម្ហែកាយនោះទេ ប៉ុន្តែគឺទៅដើម្បីពិនិត្យច្រមុះធ្វើទុក្ខដែលបានបាក់ខ្ទង់ ព្រោះតែរងអំពើហិង្សាជាមួយពេទ្យថៃផងដែរ។ យ៉ាងណាមិញ នាងមិនទាន់ច្បាស់ថានឹងកែសម្ផស្សក្នុងដំណើរលើកនេះទេ ដោយសារតែនាងទៅត្រឹមរយ:ពេលខ្លី និងគ្រាន់តែទៅដាក់ថ្ងៃទៅជាថ្មី ដើម្បីពិនិត្យរកថ្ងៃព្យាបាលក្នុងពេលបន្ទាប់។

ពេជ្រ អាវីហ្សា ថ្លែងប្រាប់Post News ថា នាងគ្រោងស្នាក់នៅប្រទេសថៃត្រឹមតែរយ:ពេល៣ថ្ងៃប៉ុណ្ណោះ ដោយនឹងត្រលប់មកវិញនៅថ្ងៃទី១៣ មករា ដោយសារតែមានមិត្តភ័ក្ត្រ និងបងប្រុសម្នាក់អមដំណើរទៅជាមួយ ហើយម្នាក់ៗសុទ្ធតែមិនអាចជូននាងទៅថៃបានយូរ។ នាងថាខ្លួនទៅគ្រាន់តែក្នុងបំណងពិគ្រោះរឿងច្រមុះជាមួយពេទ្យថៃ ទើបនាងសម្រេចចិត្តយកមិត្តភ័ក្រ្តទៅជាមួយដើម្បីបានដើរលេងជុំគ្នាផង។ នាងថាដំណើរទៅពិគ្រោះបញ្ហាសម្រស់លើកនេះ មានរយ:ពេលខ្លីប៉ុណ្ណោះ ទើបនាងនឹងទៅត្រឹមតែពិភាក្សា និងណាត់ពេទ្យ ហើយដាក់ថ្ងៃទៅព្យាបាលក្នុងពេលបន្ទាប់ កុំឲ្យអ្នកទៅជាមួយអន់ចិត្តរឿងរង់ចាំនាងទម្រាំព្យាបាលរួច។ ក្រោយការណាត់ពេទ្យ នាងនឹងដាក់ថ្ងៃទៅម្ដងទៀតក្រោយពេលប្រមូលលុយកាក់គ្រប់ចំនួន ប៉ុន្តែមិនទាន់ច្បាស់ថានឹងមានអ្នកណាទៅជាមួយដូចដំណើរលើកនេះឡើយ។ ទោះជាការព្យាបាលច្រមុះធ្វើទុក្ខនៅមិនទាន់បានសម្រេច តែនាងមានអារម្មណ៍ស្រស់ស្រាយ ដោយសារតែមានតម្រុយគ្រប់គ្រាន់សម្រាប់ការណាត់ពេទ្យទៅព្យាបាលក្នុងពេលខាងមុខ។ អ៊ីចឹងហើយទើបនាងឆ្លៀតពេលដើរលេង និងលម្ហែកាយសម្រាប់ដំណើរលើកនេះ។

ពេជ្រ អាវីហ្សា ប្រកាសទទួលសម្ដែងដូចអ្វីដែលនាងធ្លាប់ចេញមុខ បន្ទាប់ពីច្រមុះ និងស្នាមជាំដែលកើតចេញពីអតីតសង្សារ វាយដំត្រូវបានព្យាបាលរួចរាល់ក្នុងដំណើរទៅកាន់ ប្រទេសថៃលើកក្រោយ៕