ក្នុងឱកាសចូលឆ្នាំកាន់តែខិតជិតដល់នេះ តារាសម្ដែងកញ្ញា ពីង រ៉ូហ្សា ស្ទើរមិនមានពេលដេកផ្ទះតែម្ដង ដោយសារតែខាងបណ្ដាផលិតកម្មធំៗ និងម្ចាស់ផលិតផលច្រើនឡើងបានទាក់ទងអោយនាងសម្ដែងយ៉ាងគគ្រឹកគគ្រេង។ ឱកាសលេចមុខលេចមាត់ជាន់ៗជើងនេះ កញ្ញារំពឹងយ៉ាងច្រើនថា នឹងឡើងកូដច្រើនឡើងនៅក្រោយចូលឆ្នាំ។

កញ្ញាពីង រ៉ូហ្សា និយាយថានាងសប្បាយចិត្តយ៉ាងខ្លាំងដែលការងាររត់រក រហូតធ្វើអោយនាងសឹងនឹងរកពេលសម្រាកមិនបាន។ នាងថាខ្លួនបានបណ្ដែតនៅលើនាវាសិល្បៈមិនសូវច្រើនឆ្នាំប៉ុន្មាននោះទេ ទើបចាត់ទុកថាគឺជាជោគជ័យធំមួយដែលនាងចាប់ផ្ដើមកើនឡើងទីផ្សារ។ នាងថាការប្រឡូកក្រុមCambodia super model ដែលដឹកនាំដោយពិធីការិនីល្បីឈ្មោះឌួង ហ្សូរីដា បានរុញអោយនាងចាប់ផ្ដើមក្រសោបបានដំណែងជាពិធីការិនីក្នុងកម្មវិធីថែរក្សាសម្រស់របស់មជ្ឈមណ្ឌលផ្កាយប្រាក់មុននេះ និងទទួលបានការសម្ដែងជាបន្តបន្ទាប់ ជាពិសេសខ្សែរឿងភាគទូរទស្សន៍។ នាងសារភាពថា មិនខ្វះបុរសៗទ្រព្យស្ដុកតាមស្នេហ៍អ្នកនាងនោះទេ ជាពិសេសមន្ត្រីធំ និងអ្នកជំនួញ តែបណ្ដាលមកពីនាងកាន់តែរវល់នឹងការងារ ទើបមិនដែលខ្វាយខ្វល់នឹងរឿងមួយនោះ។ នាងសារភាពថាមិនទាន់ចង់គិតស្នេហានោះទេ ដោយសារតែនាងភពប្រសព្វជាមួយបុរសដែលតាមស្រឡាញ់នាងកន្លងមក សុទ្ធតែដាក់សម្ពាធអោយនាងមិនអោយលេចមុខលេចមាត់ក្នុងសិល្បៈ។

ពីង រ៉ូហ្សា និយាយថាមិនខ្វល់រឿងអ្នកមិនជឿថានាងមិនមានស្នេហានោះទេ ប៉ុន្តែអ្វីដែលសំខាន់គឺនាងនបេះដូងទំនេរ ហើយចង់សកម្មជាមួយការសម្ដែងច្រើនជាង ។ នាងនិយាយថា«រឿងអ្នកតាមស្រលាញ់មិនអត់ទេបងហើយបើប្រាប់គេថា អត់ក៏គ្មាននរណាជឿដែរ។ ប៉ុន្តែក្នុងពេលនេះខ្ញុំចង់ផ្តោតតែលើអាជីពសិល្បៈតែប៉ុណ្ណោះព្រោះខ្ញុំចង់ឲ្យអាជីពសិល្បៈរបស់ខ្ញុំកាន់តែល្អប្រសើរជាងនេះសិន»។ នាងថារឿងគូអនាគត មិនផ្ដោតលើបុរសដែលមានទ្រព្យស្ដុកស្ដម្ភនោះទេ ពោលគឺនាងចង់បានបុរសដែលចេះយល់ចិត្តនិងផ្ដល់សេចក្ដីស្រលាញ់ ឲ្យនាងពិតប្រាកដទៅបានហើយ។ នាងប្រកាសថាខ្លួននឹងលេចធ្លោច្រើនឡើង ក្រោយមានឱកាសចេញមុខចេញមាត់នៅមុនអំឡុងចូលឆ្នាំខ្មែរ ជាពិសេសបន្ទាប់ខ្សែរឿងមួយចំនួនដែលនាងសម្ងំសម្ដែង។ នាងថាខ្សែរឿង«ណារ៉ូនិងសូម៉ាលី»ខ្សែរឿង«ម្ចាស់ចំការ» គឺជារឿងដែលនាងរំពឹង៕