កាលពីព្រឹកថ្ងៃទី២៥ ឧសភា មុននេះ ភាពយន្តខ្នាតធំរឿង«ណូលីណូឡា»ដែលត្រូវបានផលិតកម្មមហាហង្សប្រកាសជាភាពយន្តខ្នាតធំទ្រង់ទ្រាយធំ ដែលចម្រុះដោយតារាល្បីច្រើនរូប និងចំណាយទុនច្រើនរូបបានដំណើរការក្រុងពាលី ដោយប្រកាសអ្នកនាង ភិន សុដាលីស អោយក្លាយជាតួឯកយ៉ាងកាលីប ជាមួយតារាប្រុសកូនកាត់រូស្ស៊ី និងកញ្ញាឌុច លីដា។ នេះជាវត្តមានថ្មីក្នុងតំណែងជាតួឯក បន្ទាប់ពីតារាស្រីរូបនេះ ត្រូវគេដឹងថាបានតំណែងតួឯកក្នុងភាពយន្តភាគធំមួយមុននេះ របស់ PNN។

ការប្រកាសអោយដឹងពីគម្រោងថតភាពយន្តនេះ ត្រូវគេកត់សម្គាល់ថាមានការចាប់អារម្មណ៍ច្រើនជាងភាពយន្តផ្សេងៗដែលផលិតកម្មមហាហង្សផលិតឡើងដោយសារតែសាច់រឿងទាំងមូលត្រូវប្រើបច្ចេកទេសខុសប្លែកជាងមុន និងចំណាយទុនខ្ពស់ជាងមុនដោយសូម្បីតែលើតម្លៃខ្លួនតារាសម្ដែងក៏ត្រូវបានប្រកាសថាចំណាយច្រើនជាងមុន។ យ៉ាងណាមិញផលិតករដែលបានប្រកាសពីគម្រោងចេញថតរឿងនេះបានបង្ហាញពីការបារម្ភពាក់ព័ន្ធនឹងរឿងតារាសម្ដែងដែលលោកបានជ្រើសគឺសុទ្ធតែល្បី ដែលពិតជាធ្វើអោយរឿងក្នុងពេលចេញថត រាំងស្ទះខ្លះព្រោះតែតារាល្បីគឺជាប់លំដាប់កំពូលរវល់។

លោកអ៉ិន ម្ចាស់ផលិតកម្មមហាហង្សបានថ្លែងអះអាងថាក្នុងចំណោមខ្សែរឿងប្រមាណជាង១០រឿងដែលលោកផលិតឡើងសម្រាប់ដាក់បញ្ចាំងតាមរោង គឺមានតែរឿង«ណូលីណូឡា»មួយប៉ុណ្ណោះ ដែលលោកចាត់ទុកថាជារឿងធំដែលចម្រុះដោយតួល្បីៗសឹងគ្រប់តួសម្ដែងតែម្ដង និងជារឿងដែលលោកតាំងចិត្តថានឹងធ្វើអោយមានប្លង់ស្ដង់ដារៗប្រកបដោយគុណភាព ដើម្បីប្រកួតប្រជែង។ តារាសម្ដែងនៅក្នុងរឿងនោះលោកបានប្រកាសមានតាំងពីនាយក្រឹម លោកពែកមី និងអ្នកនាងខ្ញុងជាដើម ដោយមិនទាន់រាប់តារាជាតួអង្គធំៗផ្សេងទៀតនោះផង។ ក្នុងរឿងមួយនេះភិន សុដាលីស គឺជាតួឯកប៉ិនគ្នាជាមួយនឹងកញ្ញា ឌុច លីដា ដោយពួកនាងទាំំងពីរត្រូវសម្ដែងជាតួកូនភ្លោះ និងមានចរឹតសម្ដែងខ្លាំង បើធៀបនឹងអ្នកទាំងពីរធ្លាប់សម្ដែងរឿងមុនៗ។ លោកថាការលើកកូនស្រីអោយសម្ដែងតួឯក គឺមិនមែនក្នុងន័យលើកស្ទួយកូនស្រីដោយមិនសំឡឹងមើលពីបរិបទនោះទេគឺដោយសារតែសាច់រឿងទាំងមូលសមស្របនឹងសាច់រឿងប៉ុណ្ណោះ ទើបលោកអោយសម្ដែងនឹងឌុច លីដា និងដើម្បីតម្រូវទីផ្សារភាពយន្ត។ នៅក្នុងរឿងនេះ លោកហ៊ានចំណាយលុយយកតួល្បីៗដែលលោកយល់ឃើញថាគឺជាអ្នកមានសមត្ថភាពក្នុងការសម្ដែងអោយមកសម្ដែងតែម្ដង ដោយសារតែលោកមិនចង់អោយរឿងដែលលោកយល់ថាមានការអប់រំ និងមានសាច់រឿងល្អ មិនទាក់ទាញវិញប្រសិនជ្រើសយកតួសម្ដែងអោយសម្ដែងមិនដល់។ លោកថារឿងនេះយ៉ាងហោចត្រូវចំណាយច្រើនជាង៦ម៉ឺនដុល្លារ ហើយក៏មិនប្រើពេលថតតិចជាង៣ខែប៉ុណ្ណោះ ទើបមានគុណភាពគ្រប់គ្រាន់។

អ្នកនាង ភិន សុដាលីស និយាយថានេះជារឿងកំប្លែងថ្មីដែលនាងបានតំណែងតួឯក ដោយសាច់រឿងទាំងមូលគឺនាងត្រូវសម្ដែងជាតួភ្លោះជាមួយនាងឌុច លីដា ហើយមានប្លង់ស្នេហាផងដែរជាមួយនឹងតារាប្រុសជាកូនកាត់រូស្ស៊ី។ ប៉ុន្តែនាងថាមិនមានប្លង់ហួសហេតុលើសពីទម្រង់សិល្បៈ នាំអោយមានការរិះគន់នោះទេ៕

https://www.youtube.com/watch?v=cOPqM-W2CAc