ក្នុងការបង្ហាញភាពយន្តភាគរឿង «ពស់កេងកង» ដែលជារឿងថ្មីស្រឡាងរបស់ទូរទស្សន៍PNN តារាសម្ដែងលោក ទេព រិន្ទដារ៉ូ ត្រូវគេឃើញសម្ដែងជាតួអង្គពស់កេងកងបានយ៉ាងល្អ ដោយលោកក៏សម្ដែងក្នុងឈុតអង្គុយឆ្លងឆ្លើយជាមួយពស់ធំមួយផ្សេងទៀតហាក់ដូចជាលោកមិនខ្លាចសត្វពស់ ផ្ទុយពីអ្វីដែលលោកធ្លាប់អះអាងថាខ្លួនខ្លាចនោះដែរ។ យ៉ាងណាមិញមានការទម្លាយថា ការពិតទម្រាំអាចថតមួយប្លង់ៗដែលមានសត្វពស់លេងផង គឺលោកភ័យចង់រាគនោម និងសុទ្ធតែមានការចាប់ចងពស់តូចពស់ធំនោះផង ទើបលោកហ៊ានសម្ដែង។

កញ្ញា ដួង ម៉ានិច ជាតួអង្គភរិយារបស់លោកទេព រិន្ទដារ៉ូ ក្នុងរឿង«ពស់កេងកង»នោះ បានអះអាងថាលោកទេព រិន្ទដារ៉ូ ពិតជាឃើញសត្វពស់មិនខុសពីឃើញខ្មោចលង ដូចអ្វីដែលលោកធ្លាប់បានបង្ហើបមែន។ ជាក់ស្ដែងឲ្យតែទីតាំងណាដែលមានពស់នៅកន្លែងដែលលោកត្រូវថត គឺលុះត្រាតែខាងផលិតករ យកពស់នោះចេញឲ្យផុត ទើបលោកហ៊ានចូល។ លោកត្រូវគេឲ្យសម្ដែងជាតួអង្គប្រែក្រឡាជាមនុស្ស ប៉ុន្តែអត់មានឈុតណាដែលលោកត្រូវសម្ដែងជួបពស់នោះទេ គឺមានតែឈុតដែលលោកនិយាយជាមួយពស់មួយផ្សេងទៀតប៉ុន្មានប្លង់គត់ ដែលពស់ទាំងនោះទម្រាំលោកហ៊ានថតជាមួយគឺលុះត្រាតែផលិតករចងខ្សែពីរកុំឲ្យលូនរួច។

លោកទេព រិន្ទដារ៉ូ នៅតែអះអាងថាលោកខ្លាចសត្វពស់ដូចក្មេងខ្លាចខ្មោច តែលោកមិនខ្វល់រឿងអ្នកណាថាលោកជាតារាជើងចាស់ទៅហើយ នៅតែខ្លាចសត្វពស់មិនសមជាបុរសដើមទ្រូងប្រាំហត្ថ។ លោកថាកញ្ញាដួង ម៉ានិច និយាយត្រូវដោយសារតែភាពជាក់ស្ដែងគឺឲ្យតែឃើញពស់លូន ឬមានចលនា គឺទោះជាសត្វពស់នោះមិនលូនមករកលោក ក៏លោកភ័យខ្លាច។ លោកថាកុំតែយល់ផលិតករកុំអីមិនទទួលថតប្លង់ត្រូវនៅក្បែរពស់ និងនិយាយជាមួយពស់ ក្នុងនាមមិត្តភក្តិនោះទេ ដោយសារតែភាពជាក់ស្ដែងគឺលោកគ្រាន់តែឃើញសត្វពស់គឺភ័យញរ័ជើង និងអាចនិយាយថាភ័យតាំងអារម្មណ៍ឲ្យល្អមិនបាន។ យ៉ាងណាក៏ដោយ លោកថាសប្បាយចិត្តដែលលោកអាចថារឿងនោះរហូតបានជោគជ័យ បើទោះជាបានបង្កផលវិបាកឲ្យខាងផលិតករ ត្រូវចងពស់ផង ចាប់ពស់ផង ខុសពីតារាផ្សេងទៀតដែលមានប្លង់ថតជាមួយពស់ដូចគ្នា។

យោងតាមការប្រកាស ភាពយន្តរឿង«ពស់កេងកង»ដែលខាងPNN ទើបផលិតសម្រេចនេះ គឺជារឿងភាគដែលគ្រោងដាក់ផ្សាយនៅដើម ខែកក្កដាខាងមុខ ដោយមានចំនួន៣៨ភាគ ដោយ១២ភាគដំបូងគឺលែងតាមលំនាំដើមនឹងរឿងដុំ«ពស់កេងកង»ទាំងស្រុង លុះដល់ភាគបន្តបន្ទាប់គឺជាការបន្លាយសាច់រឿងមួយថ្មី ដើម្បីឲ្យរឿងពស់កេងកងមានសាច់រឿងថ្មី ពាក់ព័ន្ធនឹងធ្មប់អីផង។ រឿងនេះត្រូវបានផលិតកររំពឹងខ្ពស់យ៉ាងខ្លាំងថានឹងជោគជ័យក្នុងពេលដាក់ផ្សាយជាផ្លូវការនៅដើមខែក្រោយ ដោយសារតែសាច់រឿងទាំងមូលមានរសជាតិប្លែក។ នេះបើយោងតាមអ្វីដែលបានប្រកាសក្នុងពិធីសម្ពោធរឿងដែលបានធ្វើឡើងកាលពីថ្ងៃទី១៥ មិថុនា នៅសណ្ឋាគារភ្នំពេញ៕

https://youtu.be/jlVjFBF1F10