ទើបតែរងព្រនុងរិះគន់លើការវាយប្រហារទៅលើទឹកដមសំឡេងរបស់តារាចម្រៀងសុខ ពិសី បណ្ដាលឲ្យតារាចម្រៀងសុខ ពិសី និងអ្នកគាំទ្រផ្ទុះកំហឹងមិនទាន់បាត់ធំក្លិនផង គេកត់សម្គាល់ថាតារាចម្រៀងប្រចាំផលិតកម្មថោន នាង លី អ៊ីវ៉ាធីណា ទទួលរងការរិះគន់មួយប្រាវធំទៀតហើយ បន្ទាប់ពីនាងជ្រុលមាត់និយាយថា«ផ្លាស្លាមិនមានតម្លៃសម្រាប់នាងសូម្បីតែបន្តិច»ហើយបែរជាបន្តធ្វើឲ្យរឿងមួយនោះវែងឆ្ងាយក្រោយការចុះផ្សាយជាសាធារណ:។

អ្នករិះគន់កាន់តែបង្កើនការរិះគន់ចំពោះនាងខ្លាំងឡើង ក្រោយពេលដែលនាងមិនព្រមទទួលស្គាល់ថាអ្វីដែលនាងលើកឡើងគឺជាការប្រមាថដល់តម្លៃវប្បធម៌ ហើយបានប្រើសំណេរនៅលើហ្វេសប៊ុកវាយបកអ្នករិះគន់ ដែលធ្វើឲ្យនាងបាត់តម្លៃជាតារាល្បីម្នាក់ក្នុងផ្នត់គំនិតមហាជន។

ការរិះគន់ដែលបានធ្វើឡើង គឺឡើងកម្ដៅចង់កក្រើកបណ្ដាញហ្វេសប៊ុក ដោយសារតែអ្នកចែកចាយព័ត៌មានដែលសរសេរថានាងរិះគន់តម្លៃផ្លាស្លា មិនត្រឹមតែមិនពេញចិត្តចំពោះពាក្យសម្ដីរបស់នាងប៉ុណ្ណោះទេ តែក៏មានការវាយប្រហារថានាងគឺជាតារាមិនស្គាល់តម្លៃវប្បធម៌ខ្លួនឯង មិនឲ្យតម្លៃខ្លួនឯងជាស្រ្តីម្នាក់ និងខ្លះបានប្រើពាក្យថានាងជានារីស្រលាញ់ភេទដូចគ្នាហើយគ្មានគម្រោងទទួលផ្កាស្លាជាដើម ទើបបណ្ដាលឲ្យនាងហ៊ានបោះសំដីថា«ផ្លាស្លាមិនមានតម្លៃសម្រាប់នាងសូម្បីតែបន្តិច»នោះឡើង។ បើទោះជានាងបានអះអាងនោះនោះសម្ដីនិយាយជ្រុល និងគ្រាន់តែនិយាយលេង តែគេកត់សម្គាល់ថានេះជាពាក្យសម្ដីមួយដែល តារាល្បីឈ្មោះ និងជាមនុស្សសាធារណ:ដូចនាង មិនគួរបញ្ចេញមកជាសាធារណ:ក្នុងពេលដែលនាងត្រូវបានមហាជនផ្ដោតការចាប់អារម្មណ៍នូវគ្រប់សកម្មភាព និងពាក្យសម្ដី។

មហាជនជាច្រើនបានទាមទារឲ្យនាងធ្វើការសុំទោសចំពោះពាក្យសម្ដីជ្រុលជ្រួលរបស់នាង និងថាបើនាងនៅតែបន្តមិនទទួលស្គាល់ចំពោះអ្វីដែលនាងសាងកំហុសដូចអ្វីដែលគេបានចែកចាយទៀតនោះ គឺប្រជាប្រិយភាពរបស់នាងនឹងអាចប៉ះពាល់។

លី អ៊ីវ៉ាធីណា នៅតែខឹងសម្បារចំពោះការរិះគន់ និងការរំលេចនូវអ្វីដែលនាងនិយាយជ្រុលមកធ្វើជាបញ្ហាចោទ ប៉ុន្តែមិនមានទាន់មានការបញ្ចេញនូវវិដេអូឃ្លីបសុំទោសណាមួយក្រោយការវាយសំពងដោយសំឡេងរិះគន់ពីអ្នកអភិរក្សប្រពៃណី និងពីមហាជនដែលខកចិត្តចំពោះពាក្យសម្ដីរបស់នាងនៅឡើយទេ៕