យោងតាមការបញ្ជាក់ពីលោក សាវិន ហ្វីលីព ដែលមានទំនាក់ទំនងជិតស្និទ្ធិជាមួយបានអះអាងថា លោកខៃ ប្រសិទ្ធិ បានទទូចកុំឲ្យមហាជន និងអ្នកសារព័ត៌មានបន្តរំលឹកជុំវិញភាពអយុត្តិធម៌របស់អ្នកនាងពិសិដ្ឋ ពិលីកា ដែលត្រូវបានគេសម្លាប់ ហើយរកមិនឃើញឃាតករមកទល់ពេលនេះបន្តទៅទៀត ដោយលោកបញ្ជាក់ថានោះវាអតីត និងជាអ្វីដែលលោកលែងចាប់អារម្មណ៍ទៀតហើយ។ លោកត្រូវបានដកស្រង់សម្ដីថា ចង់មានឱកាសឡើងចុះស្រុកខ្មែរដោយស្ងប់ស្ងាត់ ដោយភាពយុត្តិធម៌រឿងគេសម្លាប់ភរិយា មិនត្រូវបានលោកយកមកគិតដូចមុនទៀតទេ។

លោក សាវិន ហ្វីលីព និយាយថា លោក ខៃ ប្រសិទ្ធិ លោកឈប់មានបំណងទាមទារណាមួយជុំវិញការស្លាប់របស់អ្នកនាងពិសិដ្ឋ ពិលីកា យូរហើយ ទើបលោកចេះតែគេចអ្នកកាសែត ដោយសារតែខ្លាចមានការចោទសួរហើយធ្វើឲ្យលោកយល់ថាខ្លួនឯងមកគាស់កកាយរឿងមរណភាពរបស់ភរិយា ដែលនាំឲ្យមានការយល់ច្រឡំ។ លោកថាលោក ខៃ ប្រសិទ្ធិ និយាយថា ការស្លាប់របស់ភរិយាគឺបានកន្លងផុតទៅហើយ ដូច្នេះលោកមិនចង់សើរើ ឬជជីកគាស់កកាយណាមួយទៀតទេ ទើបលោកស្នើកុំឲ្យភ្ជាប់ឈ្មោះរបស់លោក និងមរណភាពរបស់ភរិយាដែលមិនទាន់ទទួលបាននូវយុត្តិធម៌នោះទៀត។ លោកសាវិន ហ្វីលីព និយាយថា «បងខៃ ប្រសិទ្ធិ គាត់ប្រាប់ខ្ញុំហើយ ថាគាត់អត់ចង់មានព័ត៌មានអីភ្ជាប់ពិសិដ្ឋ ពិលីកា ទេ! គាត់ថាភរិយាគាត់ស្លាប់ហើយ ទោះជាសើរើក៏អត់បានអីដែរ អ៊ីចឹងហើយបានគាត់សុំ ថាបើសរសេរពីគាត់មក គឺសុំឲ្យសរសេរតែរឿងគាត់មកស្រុក ឬមកធ្វើអី កុំឲ្យគេយល់ថាគាត់សើរើរឿងភរិយា!»។ លោកថាលោកខៃ ប្រសិទ្ធិ បានមកដល់ប្រទេសកម្ពុជាចំនួនជិតមួយអាទិត្យមកហើយ ដោយមកមើលម្ដាយឈឺ ហើយក៏ចំពេលគាត់ត្រូវបញ្ជូនម្ដាយទៅព្យាបាលនៅប្រទេសថៃផង ទើបគាត់ឆ្លៀតថតMV ឲ្យលោកក្នុងបទចម្រៀង«ឪពុកអ្នកក្រ!»។

លោកថាលោកខៃ ប្រសិទ្ធិ បានទទួលសម្ដែងដោយសារតែការរាប់អានជាមួយលោក ដោយការសម្ដែងមួយបទនេះ នឹងក្លាយជាស្នាដៃចុងក្រោយរបស់លោកសម្រាប់វិស័យសិល្បៈនោះផង។ លោកសាវិន ហ្វីលីព បន្តថា លោកខៃ ប្រសិទ្ធិ ត្រូវបានជ្រើសឲ្យសម្ដែងជាតួឪពុកអ្នកក្រ ដោយលោកបានចាត់ទុកថាវត្តមានរបស់លោកនៅក្នុងបទ«ឪពុកអ្នកក្រ»បានជួយឲ្យបទមួយនេះផ្ទុះដល់កំពូលតាំងពីមិនទាន់ចេញMV នោះផង។ លោកថាលោកខៃ ប្រសិទ្ធិ ទើបតែទទួលថតមុនរយៈពេល៣ថ្ងៃមកដល់ប្រទេសកម្ពុជាប៉ុណ្ណោះ ដោយមុនពេលឆ្លើយអូខេគឺលោកបានដឹងពីសមាសភាពតួស្រី និងសាច់រឿងក្នុងបទចម្រៀងទាំងអស់ តាំងពីនៅប្រទេសអូស្រ្តាលី។

ដំណើរមកកាន់ប្រទេសកម្ពុជាលើកនេះ លោកខៃ ប្រសិទ្ធិ ត្រូវបានប្រកាសថាចុះមកដើម្បីមើលម្ដាយ ហើយដោយសារតែលោក និងលោកសាវិន ហ្វីលីព ក៏មានគម្រោងមូលនិធិអណ្ដូងទឹកជាមួយគ្នា ក៏ឈានដល់ការយល់ព្រមថតMV ឲ្យ។ យ៉ាងណាមិញ លោកសាវិន ហ្វីលីព បញ្ជាក់ថាលោកគ្មានគម្រោងមករស់នៅកម្ពុជា និងគ្មានគម្រោងបង្ហាញខ្លួនសម្រាប់ការសម្ដែងណាមួយទៀតឡើយ៕