លោក ថោង ខុន រដ្ឋមន្រ្តីក្រសួងទេសចរណ៍ បានស្នើដល់ក្រុមហ៊ុន SlickBooth Holding ដែលជាអ្នករៀបចំពិព័រណ៍ទេសចរណ៍កម្ពុជា Cambodia Travel Mart (CTM) ឆ្នាំ ២០១៧ ដំបូងបង្អស់ នៅថ្ងៃទី ១៧ ដល់ ១៩ ខែវិច្ឆិកាខាងមុខនេះ ឲ្យមានបញ្ចូលព្រឹត្តិការណ៍កីឡា និងការរៀបចំម្ហូបអាហារពិសេស ដើម្បីទាក់ទាញភ្ញៀវទេសចរ ឲ្យបានច្រើនបំផុត។

លោក ថោង ខុន បានសំណូមពរថា លោកចង់បានអ្វីដែលថ្មីស្រឡាង អ្វីដែលទាក់ទាញ សម្រាប់ស្វាគមន៍ព្រឹត្តិការណ៍ CTM 2017 ដែលក្នុងនោះរួមមាន ការរៀបចំមុខម្ហូបពិសេស និងការរៀបចំព្រឹត្តិការណ៍ប្រកួតកីឡា។

លោកពន្យល់ទៀតថា កម្ពុជា ត្រូវតែមានការទាក់ទាញភ្ញៀវទេសចរជប៉ុន ហើយលោកក៏បានពិភាក្សាជាមួយលោក Antonio Inoki ជាសមាជិកសភាជប៉ុន និងជាអតីតកីឡាកាសជប៉ុនដ៏ឆ្នើម ដែលត្រូវបានតែងតាំងជា ឯកអគ្គរដ្ឋទូតសុច្ឆន្ទ:គណ:កម្មាធិការជាតិអូឡាំពិកកម្ពុជា កាលពីឆ្នាំ ២០១៥។

លោក Antonio Inoki ជាកីឡាកាសឆ្នើម ដែលរំពឹងទាក់ទាញភ្ញៀវទេសចរជប៉ុនយ៉ាងហោចណាស់ ៥០០០នាក់ មកតាមគាត់ បើសិនជាមានការរៀបចំព្រឹត្តិការណ៍កីឡាកាសជប៉ុន ជួបគ្នាជាមួយ ក្បាច់គុនល្បុក្កតោខ្មែរ នាឱកាសព្រឹត្តិការណ៍ CTM 2017ខាងមុខនេះ។

លោក លូ ម៉េង សហប្រធានក្រុមការងារឯកជនវិស័យទេសចរណ៍ ក៏មានគម្រោងរៀបចំ Fashion Design សម្រាប់ខ្មែរ ឲ្យកាន់តែទាក់ទាញ និងពិសេសទៀតផង ព្រោះប្រទេសដទៃសុទ្ធតែមាន Fashion Design ផ្ទាល់ខ្លួន ដូច្នេះ ខ្មែរ ចាំបាច់ត្រូវតែមានការដាក់តាំងបង្ហាញពី អត្តសញ្ញាណផ្ទាល់ខ្លួនផងដែរ។

ជាចុងក្រោយ លោក ថោង ខុន សង្កត់ធ្ងន់ថា ទីក្រុងសៀមរាប ជាម្ចាស់ផ្ទះ ត្រូវតែត្រៀមខ្លួនរួចរាល់ ត្រូវសម្អាតទីក្រុងឲ្យបានស្អាត រៀបចំឲ្យមានសណ្តាប់ធ្នាប់ រួមទាំង រាជធានីភ្នំពេញ ខេត្តព្រះសីហនុ និងរមណីយដ្ឋានទេសចរណ៍ទាំងអស់ ត្រូវតែរៀបចំឲ្យស្អាត និងមានសណ្តាប់ធ្នាប់។

គួររម្លឹកដែរថា ពិព័រណ៍ទេសចរណ៍កម្ពុជា Cambodia Travel Mart ឆ្នាំ ២០១៧ នឹងប្រារព្ធធ្វើឡើងជាលើកដំបូងបង្អស់ នៅថ្ងៃទី ១៧ ដល់ ១៩ ខែវិច្ឆិកាខាងមុខនេះ នៅរមណីយដ្ឋានសុខាសៀមរាប និងមជ្ឈមណ្ឌលសន្និសីទ ក្នុងខេត្តសៀមរាប៕