យោងតាមការប្រកាសរបស់ទូរទស្សន៍ហង្សមាស កម្ពុជានឹងរៀបចំព្រឹត្តិការណ៍ប្រកួតបវរកញ្ញាពិភពលោកធំមួយគឺ Miss Global លើកទី៥ ប្រចាំឆ្នាំ២០១៧ នៅអំឡុងខែវិច្ឆិកា ខាងមុខនេះ។ បេក្ខនារីរហូតដល់ជាង៦០ប្រទេសនៅលើពិភពលោក នឹងបង្ហាញខ្លួននៅកម្ពុជា ដោយការប្រកួតនេះ ត្រូវបានប្រកាសថាចាត់ចែង និងផ្សាយបន្តផ្ទាល់ដោយទូរទស្សន៍ហង្សមាស។

ក្រោយកិច្ចប្រជុំជាមួយគណៈកម្មការបវរកញ្ញា Global អន្តរជាតិ ថ្នាក់ដឹកនាំរបស់ទូរទស្សន៍ហង្សមាសបានអះអាងថា កម្ពុជានឹងទទួលបានសិទ្ធិរៀបចំព្រឹត្តិការណ៍មួយនេះក្នុងនាមជាម្ចាស់ផ្ទះ ដោយក្រៅពីមានស្រីស្អាតជាបេក្ខនារីតំណាងឲ្យប្រទេសកម្ពុជា ក៏មានបេក្ខនារីជាង៦០ប្រទេសនៅលើពិភពលោកមកចូលរួមប្រកួតផងដែរ។

មន្ត្រីទូរទស្សន៍ហង្សមាសបន្តថា ព្រឹត្តិការណ៍នេះហង្សមាសនឹងក្លាយជាអ្នកចូលរួមរៀបចំចាត់ចែង ដោយការផ្សាយបន្តផ្ទាល់ក៏ជាការទទួលខុសត្រូវរបស់ហង្សមាស។ ដំណឹងនេះត្រូវបានមហាជនមានការចាប់អារម្មណ៍យ៉ាងខ្លាំងដោយសារតែការប្រកួត Miss Global ជាព្រឹត្តិការណ៍ធំមួយដែររបស់ពិភពលោក ហើយហង្សមាសដែលត្រូវបានគេដឹងថាមានឆាក និងប្រព័ន្ធភ្លើងទំនើប និងមានបទពិសោធន៍រៀបចំព្រិត្តការណ៍លំដាប់ថ្នាក់ពិភពលោកបានល្អ នឹងធ្វើឲ្យព្រឹត្តិការណ៍នេះក្លាយជាវេទិកាល្អឥតខ្ចោះ។ ព្រឹត្តិការណ៍នេះត្រូវបានប្រកាសថា នឹងរៀបចំធ្វើឡើងក្នុងខែវិច្ឆិកាដោយខាងគណៈកម្មការ Miss Global នឹងធ្វើសន្និសីទប្រកាសជាផ្លូវការនៅកៀកពេលចាប់ផ្ដើមនោះផង។

បន្ថែមពីលើការប្រកាសរបស់ហង្សមាស នៅលើផេក Miss Cambodia បវរកញ្ញាកម្ពុជា និងផេករបស់មន្ត្រីហង្សមាសផ្សេងទៀត ក៏បានប្រកាសជាផ្លូវការនូវដំណឹងនេះផងដែរ៕