កាលពីយប់ថ្ងៃទី៦ តុលា លោកអ៉ិន សុភិន បានរៀបចំពិធីខួបកំណើតគម្រប់១ឆ្នាំឲ្យចៅស្រីរបស់លោក ដែលត្រូវគេស្គាល់ថាជាដំណក់ឈាមរបស់លោកប៉ែន ចំរ៉ុង យ៉ាងអធឹកអធ័មបើទោះជាពិធីនោះត្រូវបានប្រកាសថារៀបចំក្នុងភាពតក់ក្រហក់។

ពិធីទាំងមូលត្រូវលោកប្រកាសថាគ្រោងធ្វើ២០០តុ ប៉ុន្តែដោយសារតែការអញ្ជើញភ្ញៀវមិនទាន់ ទើបសម្រេចធ្វើតែជាង៤០តុវិញ។
អ្វីដែលម្នាក់ភ្ញាក់ផ្អើល គឺលោកបានប្រគល់ឲ្យចៅច្រើនជាង២ម៉ឺនដុល្លារ ដើម្បីឲ្យចៅចែកចាយថវិកាទាំងនោះជួយដល់ជនក្រីក្រ ពិសេសគឺកុមារកំព្រាដែលមានតម្រូវការជំនួយ។

លោកអ៉ិន សុភិន ចាងហ្វាងផលិតកម្មមហាហង្ស និយាយថាដើម្បីអបអរដល់ខួប១ឆ្នាំរបស់ចៅស្រីលោកគឺ ក្មេងតូច ភិន សុខេតធើរីណា (Katherina) លោកបានសម្រេចជាមួយភរិយាថា ពិធីខួបកំណើតដែលបានរៀបចំអស់ដល់ខ្ទង់ម៉ឺនដុល្លារនោះ គឺមិនយកចំណងដៃដែលភ្ញៀវចងដៃមកស៊ីសងការចំណាយនោះទេ។ លោកបានទាំងសម្រេចចិត្តបន្ថែម២ម៉ឺនដុល្លារបន្ថែមទៀត បង្កើតជាកញ្ចប់មូលនិធិឲ្យចៅស្រីរបស់លោក ដើម្បីឲ្យចៅរបស់លោកបានរួមចំណែកធ្វើបុណ្យតាមរយៈយកថវិកាដែលជាកាដូរបស់លោកទៅប្រគល់ជូនដល់កុមារកំព្រា និងជនក្រីក្រនៅកម្ពុជានោះផង។

លោកថាលោកនឹងបង្រៀនឲ្យចៅរបស់លោកធ្វើបុណ្យតាំងពីតូច ដោយលោកប្រកាសថា ថវិកាប្រមាណជាង២ម៉ឺនដុល្លារសរុបទាំងចំណងដៃរបស់ភ្ញៀវនោះ គឺលោកនឹងទុកឲ្យម្ដាយរបស់ចៅលោកសម្លឹងមើលមណ្ឌលកុមារកំព្រា ឬសហគមន៍ក្រីក្រដើម្បីឲ្យទទួលប្រាក់នោះ។

លោកបើកឱកាសឲ្យបណ្ដាអង្គការ និងមណ្ឌលកុមារកំព្រាដែលមានបញ្ហាខ្វះខាតដាក់សំណើរទទួលយកថវិកាមួយចំនួនក្នុងចំណោមទាំងជាង២ម៉ឺនដុល្លាររបស់ចៅលោក ដើម្បីឲ្យចៅរបស់លោកបានរួមចំណែកធ្វើកុសលតាំងពីវ័យ១ឆ្នាំនេះ។ មានអារម្មណ៍សប្បាយចិត្តយ៉ាងខ្លាំង ដែលចៅរបស់លោកកាន់តែធំកាន់តែធ្វើឲ្យលោកសប្បាយចិត្ត បើទោះជាត្រូវចំណាយពេលមើលថែដំណក់ឈាមរបស់លោកប៉ែន ចំរ៉ុង មួយនេះ មិនខុសពីកូនបង្កើតរបស់ខ្លួន។ លោកថាពិធីខួបកំណើតទាំងមូលលោកចំណាយច្រើនជាង៨០ភាគរយ និងអ្នកនាងភិន សុដាលីស ចំណាយប្រមាណជា២០ភាគរយ ហើយលោកប្រកាសថានឹងធ្វើខួបឲ្យចៅស្រីមិនឲ្យរំលងមួយឆ្នាំនោះទេ លើកលែងតែលោករវល់ដកឃ្លាមិនរួច។

អ្វីដែលលោកនឹងធ្វើឲ្យចៅរបស់លោកកក់ក្ដៅ គឺនាងមិនត្រឹមតែទទួលនូវការស្រឡាញ់ពីលោកដែលជាជីតាតែប៉ុណ្ណោះទេ តែនាងតូចក៏ទទួលបានការលើកមុខលើកមាត់ដូចជាក្នុងករណីដែលលោកសម្រេចចិត្តប្រគល់ឲ្យជាង២ម៉ឺនដុល្លារទាំងចំណងដៃ ដើម្បីឲ្យកូនស្រីរបស់ភិន សុដាលីស មានឈ្មោះជាអ្នកចែកទានដល់មណ្ឌលកុមារកំព្រា និងសហគមន៍ក្រីក្រនោះផងដែរ។

នៅក្នុងពិធីនោះ គេកត់សម្គាល់ថាតារាល្បីៗជាច្រើនបានបង្ហាញខ្លួន ដោយក្នុងពិធីនោះគឺសូម្បីតែយប់ជ្រៅបន្តិចក្ដី ក៏នៅតែមានវត្តមានតារាល្បី និងផលិតករដែលមានស្នាដៃបង្ហាញខ្លួន។ យ៉ាងណាមិញ លោកអ៉ិន សុភិន បានអះអាងថាចំនួនភ្ញៀវដែលបានចូលរួមយ៉ាងច្រើនកុះករនៅក្នុងវីឡារបស់លោកនាថ្ងៃនោះ គឺគ្រាន់តែជាចំណែកមួយនៃអ្នកដែលរាប់អានលោកប៉ុណ្ណោះ ប៉ុន្តែបើឲ្យគ្រប់គ្នាគឺទាល់តែរៀប២០០តុទើបអស់។

អ៉ីចឹងហើយលោកសម្ដែងអារម្មណ៍សោកស្ដាយ និងសូមទោសភ្ញៀវដែលលោកមិនបានអញ្ជើញអស់៕