ធ្លាប់តែឃើញតារាចម្រៀងអ្នកនាងឈួន សុវណ្ណឆៃ ច្រៀងរាំលើឆាក តែដល់ពេលដែលនាងប្ដូររបត់ច្រៀងផង និងរាំរបាំផង ហាក់ធ្វើអោយម្នាក់ៗមានការភ្ញាក់ផ្អើលគួរសម បើទោះជាអ្នកនាងនៅរឹងៗដៃមិនដូចជាអ្នករបាំបុរាណអាជីពនោះឡើយ។ យ៉ាងណាមិញ អ្នកនាងក៏នៅតែបង្ហាញភាពរំពើនលើឆាកនៅខាងមុខប្រាសាទអង្គរវត្ត ធ្វើអោយភ្ញៀវជាតិ និងអន្តរជាតិសរសើរមិនដាច់ពីមាត់នោះទេ ក្នុងពេលដែលអ្នកនាងគឺជាអ្នកចម្រៀងតែអាចបញ្ចេញក្បាច់រាំបែបបុរាណ អមដោយការបកស្រាយចម្រៀងបាន។

អ្នកនាងឈួន សុណ្ណឆៃ និយាយថាជាលើកទី១ ដែលអ្នកនាងសម្រេចចិត្តរាំរបាំបុរាណដែលធ្លាប់តែឃើញ នៅលើវេទិកា។ អ្នកនាងបញ្ជាក់ថាចំណាយពេលហ្វឹកហាត់តែមួយរយៈខ្លីប៉ុណ្ណោះក្នុងការរាំក្បាច់បុរាណមួយនេះ ប៉ុន្តែដោយសារតែអ្នករបាំអាជីពៗបានជួយបង្ហាត់បង្ហាញ ហើយនាងក៏បានទស្សនាវីដេអូរាំៗរបស់អ្នករបាំដោយការព្យាយាមផង ទើបអ្នកនាងអាចរាំរបាំនេះបាន ក្នុងបទចម្រៀង«នារីជាជួរ»។ អ្នកនាងថាគឺជាការពិបាកដែលអ្នកនាងគ្រាន់តែជាអ្នកចម្រៀងសម័យ និងជាអ្នកចម្រៀងចូលចិត្តបកស្រាយបទពីជំនាន់ដើម ស្រាប់តែងាកទៅរាំរបាំបុរាណ ដែលទាមទារអោយមានការពត់ដងខ្លួន និងដៃជើងអោយល្វតល្វន់អោយត្រូវនឹងក្បាច់បុរាណរបស់ខ្មែរ។ អ្នកនាងបង្ហាញអារម្មណ៍ភ័យផង អរផង ប៉ុន្តែមានអារម្មណ៍សប្បាយចិត្តក្នុងពេលដែលអ្នកនាងឡើងរាំក្នុងបទចម្រៀង«នារីជាជួរ»ក្នុងពេលក្រុមតន្ត្រីតម្រូវអោយអ្នកនាងច្រៀងរាំនៅមុខអង្គរ ក្នុងពិធីប្រគំសិល្បៈអបអរពិធីបន់ស្រន់សេចក្ដីសុខនៅអង្គរ កាលពីយប់ថ្ងៃទី២ ខែធ្នូកន្លងទៅ។

អ្នកនាងបញ្ជាក់ថាខ្លួននឹងបន្តឡើងរាំរបាំបុរាណក្នុងបទចម្រៀងដែលបានហាត់នេះលើឆាកទូរទស្សន៍បន្តទៀត ដើម្បីជាការរួមចំណែកអោយក្មេងៗជំនាន់ក្រោយស្គាល់ក្បាច់របាំបុរាណរបស់ខ្មែរ និងដើម្បីអោយកាន់តែថ្នឹកនឹងការរាំរបាំបុរាណផង ដែលអ្នកនាងប្រកាសថាជារបាំដែលស្រឡាញ់ពេញចិត្តយ៉ាងពីរតូចតែមិនមានឱកាសបានក្លាយជានាដ្យការផ្នែករបាំបុរាណនោះ។ អ្នកនាងកាន់តែសប្បាយចិត្តនៅពេលបានបង្ហាញពីទិដ្ឋភាពរាំរបាំបុរាណរបស់ខ្លួនហើយមានអ្នកគាំទ្រសរសើរច្រើននៅលើហ្វេសប៊ុក បន្ទាប់ពីអ្នកនាងធ្លាប់តែត្រូវគេដឹងថាពូកែច្រៀង និងសម្ដែងកុនកន្លងមកនោះ។
ចង់ដឹងថាអ្នកនាងឈួន សុវណ្ណឆៃ រាំបុរាណបុរាណប្លែកភ្នែកប៉ុណ្ណា សូមអញ្ជើញទស្សនា៖
https://youtu.be/q9PuUOChN3Y