បើទោះជាក្រសួងព័ត៌មានបានប្រកាសបម្រាមបិទបទ”គ្រូបង្រៀនស្រវឹងស្រា” ជាសាធារណៈ ឡើងផ្អើលមហាជន ក៏ផលិតកម្មថោននៅតែប្រកាសបង្ហោះ MV បទចម្រៀងមួយនេះ មិនញញើតនឹងការកំណត់របស់ក្រសួងព័ត៌មាន។ ការបញ្ចេញMV បទនេះ បានធ្វើឲ្យផ្ទុះការរិះគន់ជាថ្មី ដោយក្រុមអ្នកលេងហ្វេសប៊ុក បានទាំងប្រើពាក្យថា ថោនពិតជាមិនធម្មតា ដែលហ៊ានផ្គើនក្រសួងព័ត៌មានដ៏មានឥទ្ធិពល ធ្វើឲ្យគេមើលឃើញពីភាពកំសោយរបស់ក្រសួងព័ត៌មាន ក្រោយដាក់កំហិតឲ្យបិទបទនេះផង។

បទ”គ្រូបង្រៀនស្រវឹងស្រា” ត្រូវបានផលិតកម្មថោនបង្ហោះឡើងលើផេកផ្លូវការរបស់ខ្លួនគួរអោយភ្ញាក់ផ្អើលនៅប៉ុន្មាននាទីមុននេះ បើទោះជាក្រសួងព័ត៌មានបញ្ជាអោយបិទ។ នេះជាMV ដែលថោនបញ្ចេញឡើង ដោយមិនខ្វល់ពីបម្រាមរបស់ក្រសួង តែបានធ្វើអោយផ្ទុះការរិះគន់ជាថ្មី ក្រោយពីបទ”គ្រូបង្រៀនស្រវឹងស្រា” ត្រូវគេរិះគន់ផ្អើលប្រទេស រហូតក្រសួងព័ត៌មានសម្រេចបិទមិនអោយចរាចរណ៍លក់ និងដាក់បន្លឺជាសាធារណៈ ដោយលើកហេតុផលថា មានអត្ថន័យបណ្ដុះបង្អាប់តម្លៃគ្រូបង្រៀន និងជាបទដែលបណ្ដុះគំនិតអោយក្មេងៗមើលឃើញពីតម្លៃអវិជ្ជមានរបស់គ្រូបង្រៀន ដែលផ្ទុយពីទិសដៅនៃការអប់រំ និងតម្លៃសីលធម៌សង្គម។ MV ដែលថោនផលិតឡើង បើទោះជាបានបង្កប់នូវការឈឺចាប់របស់លោកគ្រូម្នាក់ដែលក្លាយជាមនុស្សស្រវឹងស្រា ព្រោះតែការបាត់បង់មនុស្សជាទីស្រលាញ់ ក្នុងរបបប៉ុលពត ក៏ខ្លឹមសារនៅក្នុងវីដេវី បានឆ្លុះបញ្ចាំងពីការបាត់បង់តម្លៃរបស់គ្រូបង្រៀន ពីអំពើហិង្សា និងអំពីភាពអវិជ្ជមានរបស់គ្រូបង្រៀន ដែលផ្ទុយពីបរិបទរបស់គ្រូបង្រៀនភាគច្រើន ដែលបានតស៊ូ ខិតខំបង្រៀនសិស្ស ដោយការទទួលខុសត្រូវខ្ពស់។ មកទល់ពេលនេះ MV បទ”គ្រូបង្រៀនស្រវឹងស្រា” ត្រូវអ្នកលេងហ្វេសប៊ុកចោទថា ជាការផ្គើនផង និងខោកក្បាលក្រសួងព័ត៌មានផង បន្ទាប់ពីក្រសួងចេញច្បាប់មិនអោយបង្ហោះ ឬចរាចរណ៍បទនេះ។

នៅមិនទាន់មានប្រតិកម្មឆ្លើយតបពីមន្ត្រីជាន់ខ្ពស់របស់ក្រសួងព័ត៌មាននៅឡើយទេ ខណៈមហាជនកំពុងចាំមើលពីចំណាត់ការរបស់ក្រសួងជាថ្មី ដើម្បីកុំអោយតម្លៃរបស់ក្រសួងព័ត៌មាន ត្រូវបានមហាជនរិះគន់។ យ៉ាងណាមិញ លោកករុណា ពេជ្រ អ្នកគ្រប់គ្រងថ្មីរបស់ផលិតកម្មថោន នៅតែអះអាងថាបទនេះ មានការអប់រំច្រើនជាងរិះគន់ តែគេមិនទាន់ដឹងថាហេតុអ្វីថោនមិនខ្វល់ពីការរិះគន់ ហើតយផ្គើនបម្រាមក្រសួងបែបនេះឡើយ៕
​
https://m.facebook.com/story.php?story_fbid=1577465162331862&id=415552108523179