Post News Media ព័ត៌មានសិល្បៈ និងកម្សាន្ត លេចដំណឹង រុន ...

លេចដំណឹង រុន ណាកូ ត្រៀមទៅប្រកួតនៅប្រទេសចិន!

ព័ត៌មានមិនទាន់ផ្លូវបានទម្លាយឲ្យដឹងថា ក្រុមបង្ហាញម៉ូដ «តារារះថ្មី» នឹងបញ្ជូនតារាពីកម្ពុជាមួយរូបឲ្យចេញទៅប្រកួតសម្រស់ជាលក្ខណ:អន្តរជាតិនៅក្នុងប្រទេសចិន នាអំឡុងខែ៨ ក្នុងឆ្នាំ២០១៨ខាងមុខនេះ ដោយតាមព័ត៌មានបានបង្ហើបឲ្យដឹងថាតារាសម្ដែង និងជាតារាម៉ូដែលចំណូលថ្មី លោករុន ណាកូ ដែលត្រូវគេស្គាល់ថាជាសមាជិកសកម្មរបស់គ្រួសារតារាកម្ពុជា ត្រូវបានក្រុមនេះទាក់ទងឲ្យចេញទៅ។ យ៉ាងណាមិញ លោករុន ណាកូ បានអះអាងថាលោកមិនទាន់ប្រាកដថានឹងទទួលយកការចេញប្រកួតនោះទេ ដោយសារតែលោកក៏មមាញឹកនឹងការថតស្ពត ការសម្ដែង និងត្រូវសិក្សាផ្នែកពេទ្យធ្មេញ ដែលមិនទាន់ដឹងថាតើអាចដកឃ្លាបានឬមិនបាននៅឡើយ។

ក្រោយការទម្លាយចេញនូវព័ត៌មាននេះ លោក រុន ណាកូ បានទទួលស្គាល់ថារូបលោកពិតជា ត្រូវបានទាក់ទងដើម្បីឲ្យចេញប្រកួតក្នុង កម្មវិធីដែលនឹងធ្វើឡើងនៅក្នុងប្រទេសចិននោះមែន តែលោកមិនទាន់ច្បាស់ថានោះជាកម្មវិធីប្រកួតសម្រស់ឈ្មោះអី និងមានប្រទេសប៉ុន្មានចូលរួមនោះទេ។ លោកថាមិនមែនជារឿងភ្ញាក់ផ្អើលនោះទេ ដោយសារតែពេលកន្លងមក គឺមុនពេលត្រូវបានក្រុមបង្ហាញម៉ូដ«តារារះថ្មី»ក្រោមការដឹកនាំរបស់កញ្ញា សូ អែនណា អតីតMiss Global Cambodia កាលពីឆ្នាំ២០១៦ ក៏មានការទាក់ទងឲ្យលោកចូលរួមប្រកួតជាលក្ខណ:ចេញក្រៅប្រទេសបែបនេះដូចគ្នា តែលោកធ្លាប់បានច្រានចោល។

លោកថាដំណើរចេញប្រកួតក្រៅស្រុក គឺជាអ្វីដែលលោកចង់បាន ប៉ុន្តែលោកក៏ពិបាកក្នុងការទទួលយកដោយស្រឡះក្នុងចិត្តផងដែរ ក្នុងពេលដែលការសិក្សារបស់លោកពិបាកឈប់ច្រើន ស្របគ្នាដែលលោកនឹងអាចប្រឈមធ្លាក់លើមុខវិជ្ជាណាមួយ ប្រសិនបើសុំច្បាប់ច្រើន។ គាប់ជួនជាការចេញប្រកួតក្រៅស្រុកបែបនេះតម្រូវឲ្យលោកត្រូវហ្វឹកហាត់ច្រើន និងត្រៀមខ្លួនក្នុងរយ:ពេលយូរផង ទើបលោកយល់ថាការពិចារណាដើម្បីចេញប្រកួតគឺស្ថិតលើ៥០លើ៥០។

លោកថាសប្បាយចិត្តដែលត្រូវបានក្រុម«តារារះថ្មី»ជម្រើសឲ្យចេញប្រកួត ប៉ុន្តែលោកថាអ្វីនៅមិនទាន់ច្បាស់លាស់១០០ភាគរយនៅឡើយទេ ក្នុងពេលដែលឯកសារពាក់ព័ន្ធនៅមិនទាន់ច្បាស់ការណ៍បែបនេះ។

លោក រុន ណាកូ ត្រូវបានគេកត់សម្គាល់ថាចាប់ផ្ដើមឡើងកូដក្នុងរយ:ពេលចុងក្រោយ ជាពិសេសបន្ទាប់ពីបានសម្ដែងក្នុងភាពយន្តរឿង«នរណា Comeback» រឿង«អាបអាលីប២០១៨» និងបន្ទាប់ពីបានលេចមុខស្ទើរគ្រប់កម្មវិធីធំៗរបស់«គ្រួសារតារាកម្ពុជា»ជាពិសេសគឺព្រឹត្តិការណ៍កម្រាលព្រំក្រហមប្រចាំឆ្នាំកន្លងទៅ។

តារាវ័យ២១ឆ្នាំរូបនេះ ក៍ត្រូវគេស្គាល់កាន់តែខ្លាំងតាមរយ:ព័ត៌មានហូរហែរជុំវិញការងារសិល្ប:របស់លោក មុនពេលបានក្លាយជាសមាជិករបស់ក្រុមបង្ហាញម៉ូដ«តារារះថ្មី»នោះផងដែរ៕