ក្នុងចំណោមតារាជាបេក្ខភាពក្នុងព្រឹត្តិការណ៍ដណ្ដើមពាន Star Award ដែលទើបចេញថតប្រម៉ូតកម្មវិធី កាលពីរសៀលថ្ងៃទី២៨ សីហា គេកត់សម្គាល់ថាមានតែតារាសម្ដែងកញ្ញា ភីយ៉ា ដែលមានឈ្មោះដើមថា លី ឌីណា និងលោក រុន ណាកូ ម្ចាស់ពានជាតារាលេចធ្លោផ្នែកគ្រងឈុតបុរាណរបស់គ្រួសារតារាកម្ពុជាប៉ុណ្ណោះ ដែលគ្រាន់តែគ្រងឈុតបុរាណហើយភ្លាម ក៏ធ្វើអោយម្នាក់ៗឆោរឡោរតែម្ដង ព្រោះតែមានវិញ្ញាណមកសណ្ឋិត។ អ្នកទាំងពីរត្រូវគេឃើញ លេចឡើងនូវអាការៈប្លែកៗ ខណៈដែល កញ្ញា ភីយ៉ា បានធ្វើអោយអ្នករៀបចំកម្មវិធីឆោរឡោច្រើនជាង ព្រោះតែនាងឈានដល់ការរាំរែកដល់ទាល់តែមនុសុ្ស២នាក់ចាប់ ទើបដឹងស្មារតីឡើងវិញ។

ស្ថានភាពដែលបានកើតឡើង គឺ ក្រោយពី កញ្ញា ភីយ៉ា គ្រងឈុតព្រះនាងឥន្ទ្រទេវី ស្របគ្នាដែល លោករុន ណាកូ គ្រងឈុតព្រះបាទសុរិយវរ្ម័នទី២ (ក្សត្រកសាងប្រាសាទអង្គរវត្ត) រួចរាល់មិនទាន់បានប៉ុន្មាននាទីផង អ្នកទាំងពីរក៏មានករណីមានវិញ្ញាណចូលសណ្ឋិតតែម្ដង។ លោករុន ណាកូ ត្រូវគេឃើញក្លាយខ្លួនជាបែកញើសធ្ងន់ក្បាល ហើយឈានដល់ការប្រើពាក្យចម្លែកៗ ខណៈដែលសាច់នៅលើដងខ្លួនរបស់លោក ស្រាប់តែមានសភាពញ័រ និងមានអាការៈសាច់ដុំរត់ចុះរត់ឡើង រហូតដល់ថ្នាក់ធ្វើអោយអ្នករៀបចំកម្មវិធីស្ទុះទាញទៅរកធូបអោយអុចបួងសួង។

នេះមិនមែនជាអាការៈចម្លែកជាលើកដំបូងនោះទេ ដ្បិតកាលពីពេលដែលលោក គ្រងឈុតមួយនេះ ចូលប្រលងក្នុងព្រឹត្តិការណ៍ប្រជែងពានរបស់គ្រួសារតារាកម្ពុជា ក៏មានអាការៈបែបនេះដែរ ដោយគ្រាន់តែក្នុងពេលនោះ លោកមានអាការៈរឹតក្បាលយ៉ាងតឹងណែនទាំងមកុដនោះធូររលុងសោះ តែសម្រាប់លើកនេះ គឺមានសភាពលោតចុះលោតឡើងនូវសាច់ដុំរបស់លោកពេញខ្លួន ដែលគ្រាន់តែឃើញក៏ញាក់សាច់ជំនួស ដែលមិនខុសពីមានអ្វីមួយរត់ពេញក្នុងសាច់។
អ្វីដែលគេចាប់អារម្មណ៍គឺគ្រាន់តែលោកចាប់ផ្ដើមធូរស្រាលនូវសភាពចម្លែកៗ ស្រាប់តែ កញ្ញា ភីយ៉ា ដែលគ្រងឈុតព្រះនាងឥន្ទ្រទេវី ក៏មានអាការៈរំពត់ពែនអែនអនបង្វិលខ្លួនចុះឡើង ដល់ថ្នាក់មនុស្ស២នាក់ចាប់ដៃចាប់ជើង ទើបធ្វើអោយនាងបានដឹងស្មារតី។ អ្នករៀបកម្មវិធីមិនត្រឹមតែស្ទុះអុជធូបប៉ុណ្ណោះទេ ប៉ុន្តែក៏បានលាន់មាត់ថា នេះពិតជាវិញ្ញាណរបស់ម្ចាស់ឈុតមកលេងនោះដែរ ទើបធ្វើអោយកញ្ញាឈានដល់រាំអែនអន។

លោក រុន ណាកូ និយាយថា មិនអាចមិនជឿបានទេ ក្នុងពេលដែលគ្រងឈុតមួយនេះ២លើក ក៏មានអាការៈចម្លែកៗទាំង២លើក។ មិនខុសគ្នាដែរ កញ្ញា ភីយ៉ា បានអះអាងថា ក្នុងពេលមានអ្វីមួយមកបញ្ជាអោយនាងបង្វិលខ្លួនរាំអែនអន នាងដឹងទាំងអស់ ប៉ុន្តែអត់អាចបញ្ជាខ្លួនឯងបានទេ ទើបនាងធ្វើអោយឆោរឡោនៅក្នុងពេលនោះ។ យ៉ាងណាមិញ នាងថានេះមិនមែនជាសភាពចម្លែកទី១នោះទេ ដោយសារតែពេលកន្លងមកនាងក៏ធ្លាប់មានវិញ្ញាណចូលសណ្ឋិតអោយរាំបែបនេះផងដែរ ជាពិសេសឲ្យតែនាងគ្រងឈុតបុរាណ៕