បន្ទាប់ពីមានឈ្មោះបោះសំទ្បេងតាមរយៈស្នាដៃ ក្នុងបទចម្រៀងកីឡាជាតិ ក្រុមចម្រៀង និងជាអ្នកផលិតបទចម្រៀង Ice Band ហាក់មានជំនឿចិត្តយ៉ាងខ្លាំង ជាមួយនឹងស្នាដៃបទ”មិនយល់”។ ប្រធានក្រុមបញ្ជាក់ឲ្យដឹងពីខ្លឹមសារ និងចំណុចពិសេសយ៉ាងខ្លាំង ដែលនាំឲ្យក្ដីសង្ឃឹមចំពោះបទនេះ មានសន្ទស្សន៍ខ្ពស់។

តំណាងក្រុម Ice Band បានថ្លែងបញ្ជាក់ថា ក្រោយបោះជំហានចូលក្នុងផលិតកម្មថោន ក្រុមចម្រៀងមួយនេះ នឹងត្រៀមបញ្ចេញស្នាដៃជាច្រើន ដើម្បីពង្រីកស្នាដៃនៅក្នុងពិភពចម្រៀង។ ជាក់ស្ដែងមកទល់ពេលនេះ មានបទភ្លេង និងបទចម្រៀងច្រើនបទមកហើយ ខណៈដែលបទទាំងនោះ នឹងត្រូវបញ្ចេញបន្តបន្ទាប់ ជាពិសេសចាប់ពីដើមឆ្នាំ២០១៩តទៅ។ ជាក់ស្ដែងចម្រៀងមួយបទក្រោមចំណងជើងថា”មិនយល់” គឺជាស្នាដៃកូនខ្មែរ ដែលក្រុមចម្រៀងទាំងមូលរំពឹងខ្ពស់យ៉ាងខ្លាំង ដោយសារតែបទ”មិនយល់” ក្រៅពីមានសាច់ភ្លេងពិរោះ មានអត្ថន័យពិរោះកប់ ក៍ជាបទចម្រៀងថ្មីមួយ ដែលក្រុមទាំងមូលបង្កើតឡើងដោយប្រើការតាំងចិត្តខ្ពស់ ដើម្បីស្នាដៃរបស់ក្រុមផងដែរ។

ស្របគ្នា ដែលបទចម្រៀងមួយនេះ ទទួលបានការគាំទ្រតែម្ដង ក្រោយការបង្ហោះយូធូបផង ទើបរឹតតែធ្វើឲ្យក្រុមមួយនេះរំពឹងខ្លាំង។ តំណាងក្រុម Ice Band បន្តថា បើសន្ទុះគាំទ្រក្នុងបទ”មិនយល់” បន្តឈានឡើងដូចការចង់បាន នោះMV បទថ្មី នឹងបន្តផលិតឡើងឲ្យកាន់តែល្អ ដើម្បីឲ្យស្នាដៃរបស់ខ្លួនផ្ទុះខ្លាំង៕