ភ្នំពេញ: មានដំណឹងគួរឲ្យសង្វែគមកថា អតីតតារាសម្ដែង ជំនាន់នាយក្រឹម នាយកុយ និងជាតារាចម្រៀង ដ៏មានទេពកោសល្យ អ្នកនាង ពេជ្រ រ៉ូហ្សា ហៅស្រីពេជ្រ កំពុងតែមានជីវភាព ធ្លាក់ដុនដាប រុំព័ទ្ធដោយជំងឺមួយចំនួន និងសំងំនៅក្នុង ផ្ទះជួលមួយកន្លែងពីរនាក់កូនស្រី ដោយទ្រាំនឹងជំងឺរួមរឹតកាយលែងបាន ធ្វើឲ្យអតីតតារាសម្ដែងដែលធ្លាប់មាន ប្រជាប្រិយភាពរូបនេះ ដាច់ចិត្តសុំក្ដីមេត្តា និងសុំជំនួយពីមិត្តរួមអាជីព ក៏ដូចជាសមាគមន៍អ្នកសិល្ប: និងសប្បុរសជន ដើម្បីព្យាបាលជំងឺ។

ជាការពិតណាស់ បច្ចុប្បន្ននេះ អ្នកនាង ពេជ្រ រ៉ូហ្សា ត្រូវបានគេដឹងថា នាងកំពុងតែមានបញ្ហា ជំងឺជាច្រើនមុខ ខណ:ដែលគ្មានលទ្ធភាពក្នុងការព្យាបាល ដោយសារគ្រួសារមានជីវភាពទីទ័លក្រជាខ្លាំង ដោយការងារសិល្ប: ក៏ត្រូវបានផ្អាករាប់ឆ្នាំ និងគ្មានចំណូលអ្វីជាដុំកំភួន សម្រាប់ទ្រទ្រង់កម្រិតជីវភាព គ្រួសារឡើយ។ ម្យ៉ាងវិញទៀត កូនស្រីអាយុ៩ឆ្នាំម្នាក់ ក៏មិនបានចូលរៀនក្នុងសាលា ដូចកូនអ្នកទូទៅដែរ ព្រោះតែគ្មានថវិកាបង់ថ្លៃសាលា។ នាងបានសម្ដែងក្ដីអាណិតដល់កូនស្រី ស្ទើរតែខ្លោចចិត្ត ទៅហើយ។

អតីតតារាចម្រៀង និងសម្ដែង អ្នកនាង ពេជ្រ រ៉ូហ្សា ហៅស្រីពេជ្រ បានថ្លែងរៀបរាប់ប្រាប់ ទាំងសំឡេងខ្សឹបខ្សួលថា ជាការពិតសព្វថ្ងៃនេះ អ្នកនាងកំពុងរស់នៅ ក្នុងស្ថានភាពលំបាកជាទីបំផុត ដោយសារតែក្នុងខ្លួន បានស្ពាយជាប់នូវជំងឺច្រើនមុខ មានដូចជាជំងឺបេះដូង ក្រពះ ពោះវៀន ហើយពេលនេះអ្នកនាងកំពុងតែមានស្ថានភាពហើមជើងទាំងពីរ ដើរទៅណាមិនរួចនោះទេ។

ដូច្នេះហើយ ទើបនាងដាច់ចិត្ត លើកដៃសុំជំនួយពីមិត្តរួមអាជីព ដែលធ្លាប់លេងកំប្លែង និងសម្ដែងជាមួយគ្នា ដែលមានដូចជា ក្រុមកំប្លែង នាយកុយ នាយក្រឹម នាយឃ្លោកជាដើម ជាពិសេសសមាគមអ្នកសិល្បករខ្មែរ និងសប្បុរសជននានា មេត្តាផ្ដល់ជាជំនួយជួយដល់នាងផ្ទាល់ ក៏ដូចជាក្រុមគ្រួសារនាងផង។

ជាមួយគ្នានេះកន្លងមក គេសង្កេតឃើញមាន សមាគមសិល្បករខ្មែរ ក៏ដូចជាសប្បុរសជនដែលធ្លាប់ស្គាល់នាង បានជួយ ដល់គ្រួសារអតីតតារារូបនេះដែរ ក្នុងនោះអ្នកនាង ពេជ្រ រ៉ូហ្សាក៏បានថ្លែងអំណរគុណ ដល់សប្បុរសជនទាំងអស់ ដែលបានផ្ដល់ក្ដីមេត្តា ហើយនាងពិតជាអរគុណ និងដឹងគុណអស់មួយជីវិត។

គួរជម្រាបថា អ្នកនាង ពេជ្រ រ៉ូហ្សា ហៅស្រីពេជ្រជាតារាស្រីម្នាក់ធ្លាប់មាន ឈ្មោះល្បី កាលពីអំឡុងឆ្នាំ ២០០០ ដោយបានចាប់ដៃគូសម្ដែង ក្នុងក្រុមកំប្លែងនាយក្រឹម និងច្រៀងតាមឆាក តន្រ្តីរបស់ស្ថានីយ ទូរទស្សន៍នានា។ ងាកមកជីវិតឯកជនរបស់នាងវិញ គឺអ្នកនាងបានបែកបាក់ស្វាមីជាយូរឆ្នាំ មកហើយ ព្រោះតែការរស់នៅមិន ចុះសម្រុងនឹងគ្នា ដោយបន្សល់ទុកនូវកូនស្រីម្នាក់ មានវ័យ៩ឆ្នាំ រស់នៅជាមួយអ្នកនាងសព្វថ្ងៃនេះ ហើយបច្ចុប្បន្ន អ្នកនាង ពេជ្រ រ៉ូហ្សា ក៏មានជំងឺប្រចាំកាយធ្ងន់ធ្ងរ ទើបកូនស្រីនោះ មិនបានសិក្សាអ្វីទាំងអស់ ។ សប្បុរសជន អាចទំនាក់ទំនងទៅកាន់លេខទូរស័ព្ទ របស់តារាសម្ដែង ពេជ្រ រ៉ូហ្សា ផ្ទាល់ តាមរយ:លេខ ០៩៨ ៧៦ ៧៨ ៧៩៕