រ៉ាំបូ៖ ​The ​Expendables ​III ​គឺ​មាន​​លោក ​Nicolas Cage

ក្រោយពីខ្សែភាពយន្តរឿង The Expendables វគ្គ ២ បានដាក់បញ្ជាំងនៅលើតាមរោងកុនរួចមក វគ្គ ៣ត្រូវបានប្រកាសចាប់ផ្តើមថត ហើយមានមហាជនជាច្រើនបាននិយាយថា នៅក្នុងវគ្គ ៣នេះ មានតារាល្បីៗជាច្រើនរូប ចូលរួមថត ដែលនៅក្នុងនោះមាន លោក ឈិន ឡុង នាង អេនជេលីណា ជួលី និងលោក នីកូឡា ខេកស៍ (Nicolas Cage)។

ព័ត៌មាននេះគឺគ្រាន់តែជាពាក្យចចាមអារ៉ាមប៉ុណ្ណោះ ហើយដើម្បីបញ្ចប់នូវពាក្យចចាមអារ៉ាមនេះ លោក Sylvester Stallone ដែលមហាជនហៅថា រ៉ាំបូ បានចេញមុខបំភ្លឺ។

លោក រ៉ាំបូ បាននិយាយថា នៅក្នុងវគ្គ ៣នៃខ្សែភាពយន្តរឿង The Expendables គឺមានលោក នីកូឡា ខេកស៍ ចូលរួមសម្ដែង តែលោក រ៉ាំបូ មិនបានបញ្ជាក់ថា មានលោក ឈិន ឡុង និង នាង អេនជេលីណា ជួលី នោះទេ។

រឿង The Expendables គឺភាពយន្តបាញ់ប្រហារមួយដែលប្រមូលផ្ដុំដោយតារាសម្ដែងល្បីៗប្រចាំហូលីវ៉ូត ក្នុងនោះមានលោកលី លានជា ដែលជាតារាសម្ដែងវាយបត់ដ៏ល្បីឈ្មោះរបស់ចិន។

គួរបញ្ជាក់ផងដែរថា រឿង The Expendables វគ្គ១ បានដាក់បញ្ចាំងនៅរោងភាពយន្តនៅក្នុងឆ្នាំ ២០១០ ដែលចំណាយលុយក្នុងការថតអស់ទឹកប្រាក់ចំនួន ៨០លានដុល្លារអាមេរិក ហើយប្រាក់ចំណូលដែលមកពីរឿងនេះ មានចំនួនជាង ២៧៤លានដុល្លារអាមេរិក (Box Office)៕