យោងតាមសារព័ត៌មានថៃ Khaosod បានចេញផ្សាយនាពេលថ្មីៗនេះឱ្យដឹងថា តារាចម្រៀងស្រី ជេននី ជាតារាចម្រៀងមនោសញ្ចេតនាបែបស្រុកស្រែមានឈ្មោះល្បី ត្រូវបានអ្នកគាំទ្ររបស់ Lisa Blackpink ចូលទៅ Comment ជេរខ្លាំងៗ ទាំងមិនសំចៃថ្វីមាត់ទាល់តែសោះនៅលើបណ្ដាញសង្គមអ៊ិនស្ដាក្រាម (IG)។

រឿងហេតុដែលកើតឡើងយ៉ាងហួសចិត្តនោះ ត្រូវបានគេដឹងថា តារាចម្រៀងស្រី ជេននី បានបង្ហោះរូបភាពនៅលើបណ្ដាញសង្គមអ៊ិនស្ដាក្រាម ដែលមានការតុបតែងខ្លួន និងលេងស្ទាយសក់សេះទម្លាក់ខាងមុខ អង្គុយនៅលើគ្រែដែលមើលទៅស្រដៀងនឹងតារាស្រី Lisa Blackpink រហូតដល់មើលមួយភ្លែតគឺអាចច្រលំគ្នាបាន។ គ្រាន់តែបង្ហោះរូបភាពនោះមិនបានប៉ុន្មានម៉ោងផង គេស្រាប់តែឃើញក្រុមអ្នកគាំទ្ររបស់ Lisa Blackpink ចូលទៅ Comment ជេរព្រោងព្រាត រហូតដល់ផ្ញើរពេញបណ្ដាញពិភពសិល្បៈក្នុងប្រទេសថៃ។

យ៉ាងណាមិញ គេបានឃើញតារាស្រី ជេននី បង្ហោះសារខ្លះៗ ដែលទំនងជាការបកស្រាយទៅកាន់អ្នកគាំទ្ររបស់ Lisa Blackpink នៅបណ្ដាញសង្គមហ្វេសប៊ុកឯណេះវិញ ដើម្បីបញ្ចប់រឿង ដោយរៀបរាប់ថា «នៅពេលនាងខ្ញុំបង្ហោះរូប សូមកុំយកនាងខ្ញុំទៅប្រៀបធៀប ឬទៅដាក់ទន្ទឹមអ្នកណាម្នាក់ឡើយ រហូតកើតមានរឿងដ្រាម៉ាបែបនេះ។ ថ្ងៃខ្លះតែងខ្លួនអាចមើលចូលភ្នែក ឡប់ខ្លះ កំប្លែងខ្លះ តែងខ្លួនតាមអ្នកនេះ តាមអ្នកនោះ គឺនាងខ្ញុំតែងខ្លួនតាមការស្រឡាញ់ចូលចិត្តរបស់ខួរក្បាលនាងខ្ញុំ មិនដែលគិតថាឱ្យដូចអ្នកណាម្នាក់នោះទេ និងមិនយកខ្លួនឯងទៅប្រៀបធៀបជាមួយអ្នកណាដូចគ្នា។ រាល់ថ្ងៃនេះ គ្រាន់តែនាងខ្ញុំតែងខ្លួនជាខ្លួនឯងបែបនេះ ក៏នៅតែពិបាកភ្នែកនៅឡើយផងហ្នឹងចា»៕