ប៉ៃលិន ៖ រថយន្តម៉ាកវីហ្គោ ពណ៌ទឹកប្រាក់១គ្រឿង បានទទួលរងការខូចខាតស្ទើរ ទាំងស្រុង ដោយសារបើកបរពេលយប់ ក្នុងល្បឿនលឿននៅត្រង់ចំណុចផ្លូវកោង លុះបួងចង្កូតមិនទាន់ ក៏បណ្តាលឱ្យជ្រុលទៅខាងឆ្វេងដៃធ្លាក់ចូលក្នុងប្រឡាយ អត់ទឹកក្រឡាប់ជាច្រើនត្រឡប់ ។ ទោះបីជាយ៉ាងណាក៏គេគិតថា ជាសំណាងល្អ ព្រោះអ្នកបើកបរ និងអ្នករួមដំណើរ អត់មានទទួលរងគ្រោះថ្នាក់ធ្ងន់ធ្ងរ ដោយគ្រាន់តែរលាត់ដៃជើងតិចតួច តែម្នាក់ៗព្រលឹងចុងសក់ ស្រែកទ្រហោពេញរថយន្ត ។

ហេតុការណ៍ករណីជនរងគ្រោះបើកបររថយន្តក្នុងល្បឿនលឿនត្រង់ចំនុចផ្លូវកោង បណ្តាលឱ្យជ្រុលចង្កូតធ្លាក់ចូលក្នុងប្រឡាយអត់ទឹកក្រឡាប់ច្រើនត្រឡប់ រងការខូចខាតយ៉ាងដំណំនេះ បានកើតឡើងកាលពីវេលាម៉ោង៨ និង៥០នាទី យប់ ថ្ងៃទី២២ ខែកញ្ញា ឆ្នាំ២០២១ ស្ថិតនៅចំណុចស្រែម្អម ទល់មុខបន្ទាយយោធា៥០៤ ស្ថិតក្នុងភូមិសាលាក្រៅ ឃុំសាលាក្រៅ ស្រុកសាលាក្រៅ ខេត្តប៉ៃលិន ។

ប្រភពព័ត៌មានបានឱ្យដឹងថា ៖ ជនរងគ្រោះមាន ឈ្មោះ សឿ ភីរ៉ា អាយុ២៨ឆ្នាំ រស់នៅក្រុងប៉ៃលិន អត់រងរបួស ដោយបើកបររថយន្តម៉ាកវីហ្គោ (Vigo) ពណ៌ប្រាក់ អត់មានស្លាកលេខ រងការខូចខាតស្ទើរទាំងស្រុង ដោយមានអ្នករួមដំណើរប្រុសស្រីចំនួន៣នាក់ទៀត សុទ្ធតែយុវវ័យ រស់នៅក្នុងក្រុងប៉ៃលិន ។

ប្រភពបន្តទៀតថា មុនពេលកើតហេតុ គេឃើញរថយន្តម៉ាកវីហ្គោ ពណ៌ប្រាក់១គ្រឿង ជិះគ្នា៤នាក់ ដោយសុទ្ធតែជាក្មេងៗយុវវ័យ ក្នុងទិសដៅពីជើងទៅត្បូង បើកបរចេញពីទឹកដីបានឡែម ភូមិដូង ស្រុកកំរៀង ខេត្តបាត់ដំបង លុះចូលមកដល់ក្នុងទឹកដីខេត្តប៉ៃលិន ក៏បើកបរក្នុងល្បឿនលឿន ពេលដល់ចំណុចផ្លូវកោង មិនបន្ថយល្បឿន បណ្តាលឱ្យជ្រុលចង្កូតទៅខាងឆ្វេងដៃ បុកដើមឈើបាក់១ដើម និងបង្គោលស៊ីម៉ង់តិ៍បាក់អស់១ដើមដែរ រួចក៏ក្រឡាប់ជាច្រើនត្រឡប់ បណ្តាលឱ្យរងការខួចខាតតែម្តង ។

ប្រភពបញ្ជាក់ទៀតថា នេះពិតជាសំណាង១លើ១០០០សំណាងហើយ ដែលរថយន្តខាងលើ បើកបរក្នុងល្បឿនលឿន ហើយក្រឡាប់ច្រើនត្រឡប់ ទទួលរងការខូចខាតយ៉ាងដំណំ តែមនុ ស្សនៅក្នុងរថយន្ត បែរជាមិនមានគ្រោះថ្នាក់ដល់អាយុជីវិត ។

ទោះបីជាយ៉ាងណា អ្នកបើកបររថយន្តទាំងឡាយ ត្រូវមានការប្រុងប្រយ័ត្នខ្ពស់ ដោយពិនិត្យមើលស្លាកសញ្ញាបង្ហាញពីគ្រោះថ្នាក់នៅតាមក្បែរចិញ្ចើមដងផ្លូវផងដែរ បើមិនដូច្នោះទេ អាចនឹងកើតមានដូចករណីមួយនេះជាក់ជាមិនខាន ។ រហូតមកដល់ព្រឹកថ្ងៃដដែល កម្លាំងនគរបាល បានចុះពិនិត្យ និងឱ្យក្រុមគ្រួសារជនរងគ្រោះ ស្ទូចរថយន្តយកទៅជួសជុលនៅក្នុងក្រុងប៉ៃលិន ៕