ខុសពីតារារៀមច្បងរួមមានទឹម រដ្ឋា កញ្ញាឌុច លីដា និងកញ្ញាសេង សូណា ជាដើម ដែលប្រកាសថតស្រាត ដោយមិនញញើតនឹងការរិះគន់ តារាសម្ដែងវ័យក្មេង ដែលត្រូវគេស្គាល់ថា ជាតួឆ្នាស់ឆ្នើមក្នុងរឿងនាង ឈិន ស៊ាវម៉ី បែរជាចេញមុខប្រកាសថា ឈប់ស៊ិចស៊ីក្នុងការសម្ដែងបើទោះជាបានល្បីលើស ហ្នឹងឬក៏អត់ទៅវិញ។

នាងបានបញ្ជាក់បែបនេះ នៅចំពោះអ្នកសារព័ត៌មានដែលតាមប្រមាញ់ពិធីខួបកំណើតរបស់នាង កាលពីយប់ថ្ងៃទី១ វិច្ឆិកាមុននេះ នៅភោជនីយដ្ឋានធំមួយម្ដុំបឹងកេងកង ។

កញ្ញា ឈិន ស៊ាវម៉ី និយាយថានាពេលកន្លងមកនាងមានទម្លាប់តែងខ្លួនស៊ិចស៊ីខ្លះៗ ប្រាកដមែន ប៉ុន្តែបន្ទាប់ពីនាងបញ្ចប់ពិធីខួបកំណើត នាងនឹងឈប់បញ្ចេញសាច់ខ្ចី ឬដើមទ្រូងដូចមុនទៀតហើយ ដើម្បីកុំឲ្យរងព្រនុងពីមហាជន និងឪពុកដែលអត់ចូលចិត្ត។ នាងថាឪពុករបស់នាងអត់ចូលចិត្តដាច់ខាត ចំពោះករណីលេចលើលេចក្រោម ដោយបានទាំងគំរាមឲ្យនាងដកខ្លួន ពីការងារសម្ដែងនោះផង ប្រសិនបើនាងបន្តស៊ិចស៊ី ឬបណ្ដាលឲ្យមានការរិះគន់ណាមួយ ។ អ៊ីចឹងហើយទើបនាងប្រកាន់ជំហរ មិនហ៊ានស៊ិចស៊ីទៀត កុំថាឡើងដល់ថតស្រាត ដូចដែលតារាមួយចំនួនក្លាហាន។ នាងថាសុខចិត្តនៅមានកេរ្តិ៍ឈ្មោះត្រឹមតែប៉ុណ្ណឹង ដោយមិនចង់ល្បីតាមលំនាំស៊ិចស៊ី ឬហ៊ានថតស្រាត នៅក្នុងភាពយន្តនោះឡើយ ។

ងាកមកកម្មវិធីខួបកំណើត របស់នាងកាលពីយប់ថ្ងៃទី១ វិច្ឆិកាមុននេះវិញ ឈិន ស៊ាវម៉ី បានអះអាងថាគឺជាលើកទី១ បន្ទាប់ពីនាងបានក្លាយជាតារាសម្ដែង ហើយមានទីផ្សារនៅក្នុងពិភពសិល្បៈ។ នាងថានេះជាខួបគម្រប់២២ឆ្នាំ ហើយហេតុផលដែលនាងប្រារព្ធធ្វើគឺដើម្បីជិតស្និទ្ធជាមួយតារាសិល្បៈ និងដើម្បីលើករាសីឲ្យមានហាងឆេងក្នុងសិល្បៈ។ ក្នុងពិធីនោះតារាល្បីៗ ដែលមានវត្តមានរួមមានលោកសាយ សៀរ៉ា កញ្ញាម៉ាក់សែន សូនីតា នាយចឺម លោកសាន ផានិត និងផលិតករ ព្រមទាំងតារាសិល្បៈក្មេងៗយ៉ាងច្រើនកុះករ។

ខាងក្រោមនេះជាបទសម្ភាសន៍ ពីជំហររបស់នាងរឿងស៊ិចស៊ី ក្នុងពិធីខួបកំណើត និងទិដ្ឋភាពក្នុងពិធីខួបកំណើត របស់ឈិន ស៊ាវម៉ី ដោយផ្ទាល់ ។

https://www.youtube.com/watch?v=pYU6jBTfN3g&feature=youtu.be