រតនគីរីៈ រថយន្តហ៊ីយ៉ាន់ដាយចំណុះ៥តោនមួយគ្រឿង បានរអិលថយក្រោយក្រឡាប់ធ្លាក់ចូលប្រឡាយចិញ្ចើមផ្លូវ តែសំណាងមិនបណ្តាលឲ្យមានគ្រោះថ្នាក់ដល់មនុស្ស និងអ្នកបើកបរទេ។

ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង១១និង៤៥នាទីថៃ្ងត្រង់ថ្ងៃទី២៤ ខែវិច្ឆិកា ឆ្នាំ២០១៦ ត្រង់ចំណុចផ្លូវឡើងចំណោទលើផ្លូវជាតិលេខ៧៨ ស្ថិតក្នុងភូមិ១ សង្កាត់កាចាញ ក្រុងបានលុង ខេត្តរតនគិរី។

អ្នកបើករថយន្តឈ្មោះ កែវ ចាន់ណា ភេទប្រុស អាយុ៣៨ឆ្នាំ និងព្រូម្នាក់បានប្រាប់ឲ្យដឹងថា មូលហេតុដែលបណ្តាលឲ្យគាត់បើករថយន្តថយក្រោយនេះ គឺដោយសារសមត្ថកិច្ចដាក់កុងត្រូលចម្រុះត្រួតពិនិត្យយានយន្តគ្រប់ប្រភេទត្រង់ចំណុចឡើងទួល ទើបធ្វើឲ្យរថយន្តគាត់ឈប់នៅចំណុចឡើងទួល ទើបបណ្តាលឲ្យរថយន្តគាត់ថយក្រោយធ្លាក់ប្រឡាយដូច្នេះ។

លោកបានបន្តទៀតថា រថយន្តគាត់ម៉ាកហ៊ីយ៉ាន់ដាយ ពណ៌ស លាយក្រហម ពាក់ស្លាកលេខភ្នំពេញ 3B-0969 ចំណុះ៥តោនបើកបរពីលិចទៅកើតដោយផ្ទុកគ្រឿងសំណង់ពេញ។

លោកបន្តទៀតថា រថយន្តរបស់គាត់បានដាច់កាលេ ទើបបណ្តាលឲ្យរយ៉ែថយក្រោយធ្លាក់ប្រឡាយរងការខូចខាតបែកកញ្ចក់ និងកំពិតជញ្ជាំងតែបន្តិចបន្តួចប៉ុណ្ណោះ។ ក្រោយកើតហេតុសមត្ថកិច្ចបានត្រឹមតែមកអើតមើល ហើយក៏ត្រឡប់ទៅកន្លែងវិញទុកឲ្យម្ចាស់រថយន្តដោះស្រាយដោយខ្លួនឯង ព្រោះមិនបានបង្កគ្រោះថ្នាក់ដល់អ្នកដ៏ទៃឡើយ៕