ភ្នំពេញៈ លោក សាយ ណូរ៉ា អ្នកនាំពាក្យអយ្យការសាលាដំបូងខេត្តកំពង់ធំ នៅថ្ងៃទី២៥ ខែវិច្ឆិកា ឆ្នាំ២០១៦ បញ្ជាក់ថា “តាមលោកព្រះរាជអាជ្ញា(លោក អ៊ិត សុធា) ប្រាប់ខ្ញុំមុននេះបន្តិច គឺករណីនេះគាត់បានសម្រេចឲ្យអ្នកទាំងអស់នោះមានសេរីភាពត្រឡប់ទៅផ្ទះវិញតាមសំណើរនិងសំណូមពររបស់លោកអភិបាលខេត្តកំពង់ធំ (លោក អ៊ុត សំអន) ហើយដោយមហាជនទាំងនេះមិនឲ្យចូលទៅតំបន់នោះដើម្បីធ្វើសកម្មភាពបន្តទៀតទេហើយឲ្យធ្វើកិច្ចសន្យាឈប់ប្រព្រឹត្ត និងត្រូវចេះកែខ្លួនគោរពវិជ្ជាជីវៈឲ្យបានត្រឹមត្រូវបើចាប់បានម្ដងទៀតគឺចាត់ការតាមច្បាប់ហើយមិនលើកលែងដាច់ខាត“។

សូមរំលឹកថា ក្រោយពីមានបណ្តឹងពីប្រជាពលរដ្ឋ នៅយប់ថ្ងៃទី២៣ ខែវិច្ឆិកា ឆ្នាំ២០១៦ លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ក្រោមបញ្ជាផ្ទាល់ពីសំណាក់អភិបាលខេត្តកំពង់ធំ លោក អ៊ុត សំអន បានដឹកនាំកម្លាំងអាវុធហត្ថ ចុះទៅបង្ក្រាបការដាក់កុងត្រូលជជុះជំរិតទារប្រាក់ពីប្រជាពលរដ្ឋដឹកកសិផល និងអុសបន្តិចបន្តួច នៅចំណុចអូរធំ ឃុំក្រយា ស្រុកសន្ទុក ដោយឃាត់ខ្លួនជនសង្ស័យចំនួន៣នាក់ ទី១ឈ្មោះ ហៀង ប៊ុនធឿន ជាមេព្រៃនៅកំពង់ថ្ម ទី២ឈ្មោះ មី រដ្ឋា ជាអ្នកសារព័ត៌មាន និងទី៣ មិនត្រូវបានស្គាល់អត្តសញ្ញាណ ជាអ្នកសារព័ត៌មាន។

សូមបញ្ជាក់ថា ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន ធ្លាប់បានរិះគន់អាជ្ញាធរដែនដីរឿងមិនមើលកុងត្រូលជជុះនៅតាមដងផ្លូវ និងបានដាក់បញ្ជាឲ្យអាជ្ញាធរពាក់ព័ន្ធសរសេរពាក្យធំនៅក្នុងការិយាល័យថា មើលផ្លូវ។ សម្តេចតេជោ ថែមទាំងសុំបិណ្ឌបាត្រពីមន្ត្រីខិតខូចដែលដាក់កុងត្រូលខុសច្បាប់នោះជំនួសព្រះសង្ឃទូទាំងប្រទេសផងដែរ ឲ្យមន្ត្រីខិលខូចទាំងនោះអនុគ្រោះដល់ពលរដ្ឋក្រីក្រ និងកុំបន្តអំពើអសកម្មទាំងនោះតទៅទៀត៕