កណ្តាល: បុរសម្នាក់ ត្រូវបានសមត្ថកិច្ចឃាត់ខ្លួនក្នុងករណីរក្សាទុកដោយខុសច្បាប់នូវសារធាតុញៀនថ្ងៃទី កាលពីវេលាម៉ោង២និង៥០នាទីរសៀល ថ្ងៃទី២៥​ ខែវិច្ឆិកា ឆ្នាំ២០១៦ នៅចំណុចលើផ្លូវជាតិ២១ ភូមិកំពង់ថ្កុល ឃុំសំពៅពូន ស្រុកកោះធំ ខេត្តកណ្ដាល។

សមត្ថកិច្ច បានឲ្យដឹងថា ជនសង្ស័យមានឈ្មោះ ឈឹម ម្លូព្រៃ(ហៅទីន) អាយុ៣៣ឆ្នាំ ជនជាតិខ្មែរ មានទីលំនៅ ភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល មុខរបរ មិនពិតប្រាកដ។ ចំណែកវត្ថុតាងចាប់ដកហូតយកបាន ម្សៅក្រាមពណ៌សថ្លាសង្ស័យសារធាតុញៀន(ម៉ាទឹកកក) ចំនួន១កញ្ចប់ធំ ម៉ូតូចំនួន១គ្រឿង ម៉ាកហុងដា ឆាលី ពាក់ស្លាកលេខ ជ-4977 ភព1 ពណ៌ខៀវ ទូរសព្ទចល័តចំនួន ១គ្រឿង និងដែកកេះចំនួន១។

សមត្ថកិច្ចបន្តថា កាលពីពេលវេលាម៉ោង២និង៥០នាទី កម្លាំងអធិការដ្ឋាននគរបាលស្រុកកោះធំ បានសហការជាមួយកម្លាំងប៉ុស្ដិ៍សំពៅពូន ល្បាតចល័តតាមដងផ្លូវជាតិលេខ២១ ដល់ចំណុចខាងត្បូងស្ពានលេខ៧០ ក៏ឃើញមុខសញ្ញាសង្ស័យប្រើប្រាស់ និងចែកចាយគ្រឿងញៀន កំពុងជិះម៉ូតូ១គ្រឿងម៉ាកហុងដា(ឆាលី)ស្លាកលេខ ជ-4977 ភព1ពណ៌ខៀវ ម្នាក់ឯងពីជើងទៅត្បូង។ ឃើញដូចនេះ កម្លាំងសមត្ថកិច្ច បានដេញតាមឃាត់ ហៅមកប៉ុស្ដិ៍ រួមនឹងថ្នាំញៀន១កញ្ចប់ធំ ដែលជនសង្ស័យបានបោះចោល ដើម្បីធ្វើការសាកសួរ។ នៅពេលនោះជនសង្ស័យ បានឆ្លើយសារភាពថា ពេលខ្លួនឃើញសមត្ថកិច្ច ហៅក៏ទម្លាក់ថ្នាំចោល ហើយជិះម៉ូតូរត់ទៅ។

បច្ចុប្បន្ន ជនសង្ស័យ និងវត្ថុតាង ត្រូវបានសមត្ថកិច្ចជំនាញនាំមកកាន់អធិការដ្ឋាននគរបាលស្រុកកោះធំ ដើម្បីសាកសួរបន្តចាត់ការតាមនីតិវិធី៕