ព្រៃវែងៈ បុរសដែលសមត្ថកិច្ចបានអះអាងថា ជាមន្រ្តីពេទ្យសត្វបានបើករថយន្តឡិចស៊ីស RX300បុកគល់ស្ពានក្រឡាប់ផ្ងារជើង បណ្ដាលឲ្យ​ស្លាប់ភ្លាមៗ​នៅនឹងកន្លែងកើតហេតុ។

គ្រោះថ្នាក់ចរាចរណ៍ ដែលបង្កឡើងដោយខ្លួនឯងនេះ បានកើតឡើងកាលពីវេលាម៉ោង១០​និង១៥​នាទី​យប់ថ្ងៃទី៩ ខែធ្នូ ឆ្នាំ២០១៦ ត្រង់ចំណុចស្ពានព្រែកអាហ៊ួរ ស្ថិតក្នុងភូមិនឹង ឃុំព្រែកក្របៅ ស្រុកពាមជរ៍ ខេត្តព្រៃវែង។

នគបាលស្រុកពាមជរ៍បានឲ្យដឹងថា ជនរងគ្រោះមានឈ្មោះ ទ្រី វិសាល ភេទប្រុស អាយុ៤៥ឆ្នាំ មុខរបរជាមន្ត្រីពេទ្យសត្វ រស់នៅភូមិនឹង ឃុំអ្នកលឿង ស្រុកពាមជរ៍ ខេត្តព្រៃវែង។

នគបាលស្រុកពាមជរ៍បានបន្តទៀតថា មុនពេលកើ​តហេតុជនរងគ្រោះបានបើករថយន្ត១គ្រឿង ម៉ាកឡិចស៊ីស RX300 ពណ៌ស្ករ ពាក់ស្លាកលេខ ភ្នំពេញ2M-9983 បើកបរក្នុងទិសដៅពីជើងទៅត្បូង លុះដល់ចំណុចកើ​តហេតុខាងលើរថយន្តបានរេចង្កូតទៅបុកនឹងគល់ស្ពានព្រែកអាហ៊ួ ហើយ​ធ្លាក់ចុះក្រោមជ្រុលទៅបុកផ្ទះរបស់ប្រជាពលរដ្ឋឈ្មោះ ជឹម សារ៉ាត់ ភេទប្រុស អាយុ៤៤ឆ្នាំ បណ្តាលឲ្យ​ក្រឡាប់ផ្ងារជើង ហើយអ្នកបើកបស្លាប់ភ្លាមៗនៅនឹងកន្លែងកើតហេតុតែម្តង។

ក្រោយពេលកើតហេតុសមត្ថកិច្ចបានចុះទៅធ្វើកំណត់ហេតុ រួចប្រគល់សាក​សពជូនក្រុមគ្រួសារ យកធ្វើបុណ្យតាមប្រពៃណី៕