ភ្នំពេញ: រថយន្តដឹកស្រាបៀរ អាន់ឆ័រ មួយគ្រឿងដាច់ហ្វ្រាំង បើកទៅបុកគូទរថយន្តតាកូម៉ាមួយគ្រឿងចតនៅស្ងៀមពីក្រោយបោលទៅបុកនឹងជញ្ជាំងកញ្ចក់ហាងម៉ាស្សាយីហោ ហូមស្តារ បណ្តាលឲ្យបែកអស់មួយផ្ទាំងធំ សំណាងល្អមិនបានបណ្តាលឲ្យមនុស្សណាម្នាក់រងគ្រោះថ្នាក់។ ហេតុការណ៍នេះដែរបានកើតឡើងកាលពីវេលា១២និង១៥នាទី ថ្ងៃត្រង់ទី១១ ខែមករា ឆ្នាំ២០១៧ ស្ថិតនៅចំណុចហាងម៉ាស្សាយីហោ ហូមស្តារ ផ្ទះលេខ៤២ ផ្លូវលេខ៤៣០ កែងនឹងផ្លូវលេខ៤៧២ ក្នុងសង្កាត់ទួលទំពូងទី ២ ខណ្ឌចម្ការមន រាជធានីភ្នំពេញ។
ប្រភពព័ត៌មានពីកម្លាំងមានសមត្ថកិច្ចនគរបាលមូលដ្ឋានបានឲ្យដឹងថា មុនពេលកើតហេតុ គេបានឃើញរថយន្តដឹកស្រាបៀរ អាន់ឆ័រ ម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 2R-6097 មួយគ្រឿងបើកបរក្នុងទិសដៅពីជើងទៅត្បូង លុះទៅដល់កន្លែងកើតហេតុ ក៏បានជ្រុលចង្កូតទៅបុកគូទរថយន្តម៉ាកតាកូម៉ា ពណ៌ស ពាក់ស្លាកលេខ ភ្នំពេញ 2T-7903 កំពុងចតនៅស្ងៀម រួចជ្រុលទៅបុកនឹងជញ្ជាំងកញ្ចក់ហាងម៉ាស្សា ហូមស្តារ បណ្តាលឲ្យបែកកញ្ចក់អស់មួយផ្ទាំងធំតែម្តង សំណាងល្អមិនបណ្តាលឲ្យមានមនុស្សណាម្នាក់រងគ្រោះ។

ក្រោយពេលកើតហេតុ កម្លាំងមានសមត្ថកិច្ចនគរបាលចរាចរណ៍ផ្លូវគោកខណ្ឌចម្ការមន ចុះមកធ្វើការវាស់វែងរកខុសត្រូវ និងមានអ្នកតំណាងភាគីខាងរថយន្តដឹកស្រាបៀរបង្ក ចេញមុខមកធ្វើការដោះស្រាយដោយទទួលចេញថ្លៃជួសជុលទាំងរថយន្ត និងជញ្ជាំងកញ្ចក់ដែលរងការខូចខាត ជាការបញ្ចប់រឿងនៅនឹងកន្លែងកើតហេតុផងដែរ៕