ភ្នំពេញៈ គ្រោះថ្នាក់ចរាចរណ៍ដ៏រន្ធត់មួយបង្កឡើងដោយរថយន្តក្រឡុកស៊ីម៉ង់ត៍របស់ក្រុមហ៊ុន ជីង ធាន បើកបរខ្វះការប្រុងប្រយត្ន័ ជ្រុលទៅបុកម៉ូតូម៉ាក MSX ដែលកំពុងបើកបរដោយយុវជនម្នាក់ជាសិស្សសាលា ត្រូវរថយន្តបង្កកិនស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធ័ម។

ហេតុការណ៍នេះបានកើតឡើងកាលពីវេលាម៉ោង ១និង១០នាទី រសៀលថ្ងៃទី១៦ ខែមករា ឆ្នាំ២០១៧ ស្ថិតនៅចំណុច ខាងមុខក្រុមហ៊ុនក្រឡុកស៊ីម៉ង់ត៍ ជីង ធាន ច្រកចូលសាលាជាស៊ីន ចំរើនរត្ន័ ស្ថិតនៅតាមបណ្តោយផ្លូវជាតិលេខ ៥ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

យុវជនដែលត្រូវរថយន្តកិនស្លាប់ខាងលើនេះ មិនទាន់ស្គាល់ឈ្មោះនោះទេ មានអាយុប្រហែល១៨ឆ្នាំ សិស្សសាលា។

ប្រភពពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញយុវជនជាសិស្សសាលាខាងលើ ជិះម៉ូតូមួយគ្រឿងម៉ាក MSX ពណ៌ខ្មៅ ពាក់ស្លាកលេខ ភ្នំពេញ 1GB-8297 តាមបណ្តោយផ្លូវខាងលើ ដែលជាចំណុចកកស្ទះដោយសារតែដងផ្លូវមួយនេះ បាននិងកំពុងធ្វើការស្ថាបនា ដោយសារតែប្រញាប់ទៅរៀនផងនោះ ជនរងគ្រោះបានបើកចូលមកចំណែកផ្លូវបញ្ច្រាសទិស ខណៈនោះស្រាប់តែរថយន្តក្រឡុកស៊ីម៉ង់ត៍របស់ក្រុមហ៊ុន ជីង ធាន ពណ៌បៃតង ពាក់ស្លាកលេខ កណ្តាល 3A-0183 បើកចេញពីក្រុមហ៊ុន មិនប្រយត្ន័ក៏ជ្រុកមកបុកម៉ូតូជនរងគ្រោះ បណ្តាលឲ្យដួល រួចរថយន្តបានជ្រុលកិនពីលើជនរងគ្រោះចំបញ្ឆិតពាក់កណ្តាលខ្លួន បណ្តាលឲ្យកៀបជាប់ខាងក្រោមកង់រថយន្ត ទម្រាំតែប្រជាពលរដ្ឋនាំគ្នាអូសជនរងគ្រោះចេញពីក្រោមកង់រថយន្តបាននោះ គឺជនរងគ្រោះបានដាច់ខ្យល់ស្លាប់បាត់ទៅហើយ ។

សូមបញ្ជាក់ថា ក្រោយពីបង្កហេតុរួចភ្លាមៗ អ្នកបើកបរថយន្តបង្កខាងលើ បានបើកទ្វារថយន្តចុះរត់គេចខ្លួនចូលក្នុងក្រុមហ៊ុនគេចខ្លួនបាត់តែម្តង ។ ដែលទង្វើខាងលើនេះ ត្រូវបានប្រជាពលរដ្ឋរិះគន់ចំៗ ថាបើកបរគ្មានការប្រុងប្រយត្ន័ បង្កគ្រោះថ្នាក់ហើយបែរជារត់គេចមិនទទួលខុសត្រូវបែបនេះទៅវិញ៕