ពោធិ៍សាត់ៈ បុរសម្នាក់ បើកម៉ូតូក្នុងស្ថានភាពស្រវឹងជោគជាំដល់កន្លែងស្ងាត់ត្រូវរថយន្តមិនស្គាល់អត្តសញ្ញាណបើកប៉ះទង្គិចដួលម៉ូតូរងរបួសធ្ងន់ធ្ងរ ត្រូវបានអ្នកដំណើរឃើញជួយប្រាប់សមត្ថកិច្ចដឹកយកទៅសង្គ្រោះ។

ឧបទ្ទវហេតុនេះ បានកើតឡើងកាលពីវេលាម៉ោង៥នឹង៣០នាទីល្ងាច ថ្ងៃទី០៨ ខែឧសភា ឆ្នាំ២០១៦ នៅលើផ្លូវក្រាលកៅស៊ូ មួយខ្សែត្រង់ចំណុចអាងបង្ហៀរទឹករលាប ក្នុងភូមិសង្កាត់រលាប ក្រុងពោធិ៍សាត់។

នគរបាលចរាចរណ៍បានឲ្យដឹងថា ជនរងគ្រោះ មានឈ្មោះ ជិន សុភា អាយុ៤៧ឆ្នាំ នៅភូមិឆ្លងកាត់ សង្កាត់រលាប ក្រុងពោធិ៍សាត់។

មុនពេលកើតហេតុ បុរសនេះ បានស្រវឹងស្រាជោគជាំ ហើយក៏បានជិះម៉ូតូសេ១២៥ ពណ៌ខ្មៅមួយគ្រឿងម្នាក់ឯង លើផ្លូវក្រាលកៅស៊ូ មួយខ្សែតភ្ជាប់ពីក្រុងពោធិ៍សាត់ ទៅស្រុកភ្នំក្រវាញ ពេលដែលមកដល់ចំណុចរាងស្ងាត់បន្តិច ត្រង់ភូមិសាស្រ្តខាងលើ ស្រាប់តែ មានរថយន្តមួយគ្រឿង មិនស្គាល់ភិនភាគ បានបើកស្របទិសគ្នា បានប៉ះទង្គិចនឹងផ្នែកចំហៀងម៉ូតូខាងឆ្វេង ដួលម្នាក់ឯងជាមួយម៉ូតូរងរបួសជាទម្ងន់ ហើយរថយន្តនោះបើកគេចខ្លួនបាត់ ស្រមោល។

ប្រភពបានបន្ដថា មួយសន្ទុះក្រោយមក ក៏មានអ្នកដំណើរឆ្លងកាត់ បានឃើញក៏ហៅសមត្ថកិច្ច និងក្រុមគ្រួសារជនរងគ្រោះដឹកយកទៅសង្គ្រោះ រួមផុតពីសេចក្ដីស្លាប់ ។

ចំណែកវត្ថុតាង ម៉ូតូបានប្រគល់ឲ្យគ្រួសារជនរងគ្រោះយកទៅផ្ទះវិញ ដើម្បីជួសជុលទុកប្រើប្រាស់វិញ ៕