Post News Media ព័ត៌មានជាតិ ឃាត់ខ្លួនស្ត្...

ឃាត់ខ្លួនស្ត្រីជួញដូរគ្រឿងញៀនម្នាក់ ទើបចេញពីគុក ជាមួយថ្នាំញៀន WY ៥៩៩គ្រាប់ និងម៉ាទឹកកក ៩កញ្ចប់ធំ

ប៉ៃលិន: កម្លាំងនគរ​បាលប្រឆាំងបទ​ល្មើសគ្រឿងញៀន នៃស្នងការដ្ឋាននគរបាលខេត្តប៉ៃលិន កាលពីវេលា​ម៉ោង ១០ និង១៥នាទីព្រឹក ថ្ងៃទី១២ ខែកុម្ភ:នេះ បានចុះធ្វើការបង្ក្រាប​ករណីជួញដូរគ្រឿង​ញៀនមួយកន្លែង ស្ថិតនៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។

នៅក្នុងប្រតិបត្តិនេះ បានធ្វើការឃាត់​ខ្លួន​ជនសង្ស័យបានម្នាក់ រួមនឹងវត្ថុ​តាង ប្រភេទយ៉ាម៉ា WY ៥៩៩គ្រាប់ និងម្សៅពណ៍ស​ថ្លា ម៉ាទឹកក​ (ICE) ចំនួន ៩កញ្ចប់ធំ ព្រមទាំងជញ្ជីងសម្រាប់ថ្លឹងគ្រឿងញៀន ១គ្រឿង។

នាយការិយាល័យប្រឆាំងបទល្មើសគ្រឿងញៀន លោក ផង់ ជឿម បានឲ្យដឹងថា «ដោយ​មានការផ្តល់ព័ត៌មានពីភ្នាក់ងារសម្ងាត់ រូបលោកផ្ទាល់ និងលោក ថុល គឹមហ៊ឹង ព្រះរាជអាជ្ញារង និងលោក ហោ គាលេង ជាចៅក្រមសាលាដំបូងខេត្ត បានចុះឆែកឆេ ផ្ទះជនសង្ស័យ ក៍ប្រទះឃើញវត្ថុតាងគ្រឿងញៀន​មួយចំនួនធំ ហើយក៍ធ្វើការឃាត់ខ្លួនស្ត្រីជនសង្ស័យតែម្តង។

ជនសង្ស័យមានឈ្មោះ ហ៊ុយ ច្រឹប ភេទស្រី អាយុ ៤០ឆ្នាំ រស់នៅភូមិឃុំកើតហេតុខាងលើ មុខរបរ​មិន​ពិតប្រាកដ ទើបតែចេញពីពន្ធនាគារ​កាលពីខែសីហា ឆ្នាំ២០១៦ ពីបទចែកចាយគ្រឿងញៀន ត្រូវជាប់ពន្ធនាគារ ៣ឆ្នាំ។
មកទល់ពេលនេះ សមត្ថកិច្ច​ជំនាញ​ កំពុកសាកសួរ និងកសាងសំណុំរឿង ដើម្បីចាត់ការទៅតាមនិតិវិធីច្បាប់៕