ភ្នំពេញ: ស្រ្តីម្នាក់បានរត់មកប្តឹងនគរបាលប៉ុស្តិ៍ចោមចៅ ឲ្យជួយអន្តរាគមន៍ដោយបានចោទប្រកាន់ប្ដីថា សប្បាយភ្លើតភ្លើន ទាក់ទងជាមួយស្រីក្រៅ និងវាយធ្វើបាបនាងញឹកញាប់ ចាប់តាំងពីនាងទើបតែសម្រាលកូនបានរយ: ពេល១០ថ្ងៃ មិនតែប៉ុណ្ណោះចោទនាងថាមានប្រុសសាហាយថែមទៀត ដែលរហូតមកទល់ពេលនេះ មានរយ:ពេល ៣ខែហើយ ដោយទ្រាំងលែងបាននាងក៏បានប្ដឹងសុំឲ្យនគរបាលប៉ុស្ដិ៍ចោមចៅ ជួយអន្តរាគមន៍កាលពីវេលា ម៉ោង១និង ១៥នាទី រសៀលថ្ងៃទី២១ ខែមីនា ឆ្នាំ២០១៧។

ស្ត្រីរងគ្រោះឈ្មោះ ចន្ធី អាយុ៣៥ឆ្នាំ មុខរបរលក់ចាប់ហួយ ស្នាក់នៅភូមិចោមចៅ សង្កាត់ចោមចៅខណ្ឌពោធិ៍សែនជ័យ រាជធានីភ្នំពេញ មានស្រុកកំណើតភូមិឈើលាស់ ឃុំជង្រុក ស្រុកគងពិសី ខេត្តកំពង់ស្ពឺ។

បុរសជាប្ដីឈ្មោះ ហៀង គឹមផុង ហៅតាវែង អាយុ៣៥ឆ្នាំ មានទីលំនៅក្នុងភូមិកប់ភ្លុក សង្កាត់ភ្លើងឆេះរទះ ខណ្ឌពោធិ៍សែនជ័យ រាជធានីភ្នំពេញ។

ស្រ្តីនោះបានរៀបរាប់ប្រាប់នគរបាលថា នាងត្រូវបានប្ដីធ្វើបាបខ្លាំងណាស់ ដោយប្តីបានបើកហាងផឹកស៊ីនៅម្ដុំមុខវត្តជន្លុងម្លូរ ហើយបានមានស្នេហាលួចលាក់ ជាមួយស្រីបម្រើនៅក្នុងហាងនោះថែមទៀតផង ហើយនាងមិនបានទៅមើលហាងនោះឡើយ ព្រោះជាប់រវល់កូនតូចទៅណាមិនរួច ទើបមិនបានដឹង។ ប៉ុន្តែមានថ្ងៃមួយ នាងបានទៅលេងហាង ស្រាប់តែបានឃើញប្ដីកំពុងឱបគ្នា នៅក្នុងបន្ទប់មួយជាមួយស្រីបម្រើ ម្នាក់នោះ ហើយពេលនាងសួរនាំប្ដីបានប្រកែក និងប្រាប់ថាគ្រាន់តែប្រឡែងគ្នាលេងប៉ុណ្ណោះ។ ខណ:នោះបុរសជាប្ដីបានយកទូរសព្ទពីដៃនាងលុបលេខដែលមាននៅក្នុងនោះចោល នៅសល់តែ៣លេខប៉ុណ្ណោះ ព្រោះមិនចង់ឲ្យនាងខលសួរអ្នកដ៏ទៃពីរឿងគាត់ឡើយ។

ស្រ្តីខាងលើបានបន្តថា ក្រោយមកនាងក៏បានត្រឡប់ទៅផ្ទះវិញ ហើយនាងបានយកលេខមួយ ក្នុងចំណោម ៣លេខដែលសល់ពីការលុបចោលនោះខលទៅ ហើយបានចូលលេខភ្ញៀវម្នាក់ ដែលឧស្សាហ៍ចូលទៅស៊ី ផឹកនៅក្នុងហាងនោះញឹកញាប់។ ពេលដែលនាងខលចូលទៅម្ចាស់ទូរសព្ទនោះ មិនបានដឹងថានាងជាប្រពន្ធដើមនោះឡើយ គាត់ក៏បានប្រាប់នាងថា ថៅកែហាងនោះធ្លាប់ទៅច្រៀងខារ៉ាអូរខេជាមួយប្រពន្ធគាត់ និងស្រលាញ់ប្រពន្ធគាត់ខ្លាំងណាស់។ បន្ទាប់ពីបានដឹងរឿងនាងបានសួរប្ដី តែត្រូវប្ដីប្រកែកទៀត តែនាងក៏មិនមាត់កអ្វីដែរ ក្រោយមកដោយសារតែប្ដីមិនសូវគិតគូនាង នាងត្រូវការស្ពុងក៏បានខលទៅអ្នកស្គាល់គ្នាឲ្យជួយ ទិញថ្នាំស្ពុងឲ្យ ហើយក្រោយពេលបានថ្នាំស្ពុង នាងបានដោះសម្លៀកបំពាក់ស្ពុង ស្រាប់តែប្ដីទៅដល់ចោទ ប្រកាន់នាងថា កំពុងដេកចាំប្រុសនិងបានទាត់ធាក់នាងឥតមេត្តា។ ដោយសារតែមានអំពើហិង្សាបែបនេះទើប នាងរត់រកនគរបាលឲ្យជួយ ហើយនគរបាលបានហៅ អ្នកទាំង២ទៅសាកសួរ និងធ្វើការអប់រំឈប់ឲ្យមាន អំពើហិង្សាតទៅទៀត៕