ព័ត៌មានជាតិ

ចាប់ខ្លួនជនសង្ស័យជាមេចោរប្លន់យ៉ាងសកម្មក្នុងក្រុងភ្នំពេញបាន២នាក់ ក្នុងនោះមានអ្នកកាសែតម្នាក់ ដកហូតកាំភ្លើង១ដើម

ភ្នំពេញ: ជនសង្ស័យចំនួន២នាក់ ក្នុងនោះមានអ្នកកាសែតម្នាក់ ដែលជាមេចោរប្លន់ លួចកាច់កម៉ូតូ និងគាស់ផ្ទះប្រជាពលរដ្ឋ យ៉ាងសកម្មក្នុងរាជធានីភ្នំពេញ ត្រូវបានកម្លាំងនគរបាលជំនាញព្រហ្មទណ្ឌ នៃអធិការដ្ឋាននគរបាលខណ្ឌសែនសុខ សហការជាមួយកម្លាំងនគរបាលប៉ុស្តិ៍ក្រាំងធ្នង់ឃាត់ខ្លួនបាន នៅរសៀលថ្ងៃទី២២ ខែមីនា ឆ្នាំ២០១៧នេះ។

លោក ម៉ក់ ហុង អធិការនគរបាលខណ្ឌសែនសុខ បានឲ្យដឹងថា នៅវេលាថ្ងៃត្រង់នេះ កម្លាំងជំនាញនិងប៉ុស្ដិ៍រដ្ឋបាលក្រាំងធ្នង់ នៃអធិការដ្ឋាននគរបាលខណ្ឌសែនសុខ បានការស្រាវជ្រាវឃាត់ខ្លួនជនសង្ស័យមុខសញ្ញាសកម្ម លួចកាច់ក និងកាន់កាប់អាវុធខុសច្បាប់ចំនួន២នាក់ នៅចំណុចបណ្តោយផ្លូវ២០១១ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ។

ក្នុងនោះដែរ កម្លាំងធ្វើការដកហូតបាន ម៉ូតូ១គ្រឿង ,ដែកកាច់កម៉ូតូ១, អាវុធខ្លី១ដើមម៉ាកK59 មាន៧គ្រាប់ និងបង់មួយ។

ចំណែកជនសង្ស័យទាំង២នាក់ខាងលើ ត្រូវបានសមត្ថកិច្ចសែនសុខ នាំខ្លួនមកធ្វើការសាកសួរនៅអធិការដ្ឋាននគរបាលខណ្ឌសែនសុខ ដើម្បីចាត់ការបន្តតាមនីតិវិធីច្បាប់៕

មតិយោបល់