ភ្នំពេញ: នារីជាជាងអ៊ុតសក់ម្នាក់ រួមដំណើរដោយសាច់ញាតិ បានធ្វើដំណើរស្វែងរកបុរសអ្នករត់ម៉ូតូឌុបម្នាក់ ដែលត្រូវជាឪពុកបង្កើតរបស់នាងតាមគ្រប់ច្រកល្ហក ដោយនាងនិយាយថាឪពុកនាងបានបាត់ខ្លួន អស់រយៈពេល៤ថ្ងៃកន្លង មកហើយមិនដឹងជាទៅណា បន្ទាប់ពីបាននាំគ្នាដើររកមិនឃើញ ទើបនៅវេលាល្ងាចថ្ងៃទី២៣ ខែមីនា ឆ្នាំ២០១៧នេះ កូនស្រីគាត់រួមជាមួយក្មួយៗរបស់គាត់នាំគ្នា ធ្វើដំណើរទៅកាន់ប៉ុស្ដិ៍សង្កាត់ចោមចៅ ខណ្ឌពោធិ៍សែនជ័យ ដើម្បីឲ្យជួយអន្តរាគមន៏ស្វែងរកគាត់។

បុរសដែលបានបាត់ខ្លួននោះឈ្មោះ ភួន ស៊ីថា អាយុ៥១ឆ្នាំ មុខរបររត់ម៉ូតូឌុប មានស្រុកកំណើតនៅក្នុង ភូមិថ្កូវ ឃុំកញ្ចុំ ស្រុកពារាំង ខេត្តព្រៃវែង និងស្នាក់នៅផ្ទះជួលនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ។ ចំណែកកូនស្រីដែលតាមរកឪពុកនោះ ឈ្មោះថា ចន្ធូ អាយុ២១ឆ្នាំ មុខរបរជាងអ៊ុត សក់ស្នាក់នៅជាមួយឪពុកនាងដែរ។

នារីខាងលើនោះបាននិយាយថា កាលពីវេលាម៉ោង៤ល្ងាចថ្ងៃទី១៩ ខែមីនា ឆ្នាំ២០១៧ ឪពុករបស់នាង
បានចេញទៅផឹកស៊ីនៅខាងក្រៅផ្ទះជា មួយអ្នករត់ម៉ូតូឌុបដូចគ្នា លុះពេលផឹកអស់ស្រាបៀរតែ១កំប៉ុង ក៏ឈប់ផឹក ហើយបានជិះម៉ូតូ១គ្រឿងម៉ាកហុងដា ឌ្រីមសេ១២៥ ស៊េរីឆ្នាំ២០១០ ពណ៌ខ្មៅពាក់ស្លាកលេខ តាកែវ1E-4537ត្រឡប់ទៅផ្ទះវិញ។ បន្ទាប់មកគាត់បានផ្លាស់សម្លៀកបំពាក់ថ្មី រួចក៏បានជិះម៉ូតូនោះចាក ចេញពីផ្ទះបាត់រហូតដោយមិនបាន ប្រាប់ថាទៅណាឡើយ ហើយនាងស្មានថាគាត់ទៅកន្លែងផឹកវិញ ទើបមិនបានសួរថាទៅណា។

ក្រោយពេលដឹងថាគាត់បាត់ខ្លួន នាងនិងសាច់ញាតិបានតាមរកគ្រប់ទីកន្លែង ប៉ុន្តែមិនបានឃើញទាល់តែសោះ ទើបនាងនិងក្រុមគ្រួសារ សម្រេចចិត្តទៅដាក់ពាក្យបណ្ដឹង សុំឲ្យនគរបាលជួយអន្តរាគមន៏រកផង៕

https://www.youtube.com/watch?v=eoBGzPk2gxE&feature=youtu.be