ភ្នំពេញ: ភ្នាក់ងារPost Newsបានឲ្យដឹងថា កាលពីវេលាម៉ោងជាង១០យប់ ថ្ងៃទី២៩ ខែមីនា ឆ្នាំ២០១៧ មានករណីរថយន្តបុកអូសស្រ្តីម្នាក់ចម្ងាយ៥០ បណ្តាលអោយស្រ្តីរងគ្រោះស្លាប់ភ្លាមៗនៅនិងកន្លែងកើតហេតុយ៉ាងអាណោចអាធ័ម ខណៈដែលមេឃកំពុងភ្លៀងជោគជាំផងនោះ ។

ដែលហេតុការណ៍នេះបានកើតឡើងនៅចន្លោះផ្លូវវេងស្រេងនិងផ្លូវម៉ៃដា តាមបណ្តោយផ្លូវឧកញ៉ាឌួងងៀប ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។

ប្រភពដដែលបានបន្តថា មុនពេលកើតហេតុស្រ្តីម្នាក់ធ្វើដំណើរតាមបណ្តោយផ្លូវឧកញ៉ាឌួងងៀបក៏មានរថយន្តដឹកកង់ឡានមួយគ្រឿងគ្មានស្លាកលេខជាកម្មសិទ្ធិរបស់ក្រុមហ៊ុនដឹកជញ្ជូន ទ្រី ស៊ូមុី ហៅកាត់ TSM ដែលបើកបរដោយតៃកុងពុំស្គាល់អត្តសញ្ញាណ បានរត់គេចខ្លួនក្រោយពេលកើតហេតុ បន្សល់ទុកនូវវត្ថុតាងមួយចំនួននិងសាកសពស្រ្តីម្នាក់ពុំស្គាល់អត្តសញ្ញាណដូចគ្នា ដេកស្លាប់ក្នុងថ្លុកឈាមក្រោមដំណក់ទឹកភ្លៀងស្រិចៗ ពុំដឹងថាក្រុមគ្រួសារកំពុងរង់ចាំឬយ៉ាងណានោះទេ ។

ក្រោយកើេតហេតុសមត្ថកិច្ចបានចុះមកធ្វើការវាស់វេងធ្វើកំណត់ហេតុ និងយកវត្ថុតាងរថយន្តបង្កហេតុទៅរក្សាទុកនៅប៉ុស្តិ៍ទឹកថ្លា រង់ចាំសភាគីរថយន្តចូលខ្លួនមកធ្វើការដោះស្រាយព្រោះមានឯកសារពាក់ព័ន្ធដែលអាចស្វែងរកជនបង្កហេតុបាន រីឯសាកសពស្ត្រីរងគ្រោះសមត្ថកិច្ចកំពុងស្វែងរកអត្តសញ្ញាណក្រុមគ្រួសារដើម្បីប្រគល់សាកសពឲ្យធ្វើបុណ្យតាមប្រពៃណី ៕