ព័ត៌មានជាតិ

ក្រោយពីមានរិះគន់ខ្លាំងពីប្រជាពលរដ្ឋ ក្រសួងរ៉ែ និងថាមពល ព្រមានដល់ដេប៉ូខ្សាច់ចំនួន៤និងបិទរណ្តៅដី២កន្លែងបណ្តោះអាសន្ន

កណ្ដាល: ភ្នាក់ងារPost Newsបានឲ្យដឹងថា នៅថ្ងៃទី២៩ ខែមិនា ឆ្នាំ២០១៧ លោក ឌិត ទីណា រដ្ឋលេខាធិការក្រសួងរ៉ែ និងថាមពល ដោយមានការចូលរួមពីមន្ត្រីរ៉ែថ្នាក់ខេត្ត កងកម្លាំងអាវុធហត្ងខេត្ត កម្លាំងការិយាល័យចរាចរណ៍ផ្លូវគោកនៃស្នងការដ្ខាននគរបាលខេត្តកណ្តាល និង អភិបាលរងខេត្តកណ្ដាល បានដឹកនាំកម្លាំងចុះត្រួតពិនិត្យមើលការដ្ឋានជីកដី និងដេប៉ូខ្សាច់មួយចំនួន នៅភូមិសាស្ត្រខេត្តកណ្ដាល ដោយលទ្ធផលបានផ្អាកការដ្ឋានជីកដី២កន្លែងនៅស្រុកកណ្ដាលស្ទឹង និង ព្រមានដល់ដេប៉ូខ្សាច់ចំនួន៤នៅក្រុងតាខ្មៅផងដែរ ។

ប្រតិបត្តិការពេញមួយថ្ងៃគឺនៅថ្ងៃទី ២៩ ខែ មីនា ឆ្នាំ ២០១៧នេះ ធ្វើឡើងបន្ទាប់ពីទទួលរងការរិះគន់យ៉ាងចាស់ដៃពីសំណាក់បងប្អូនប្រជាពលរដ្ឋពីការបង្កបញ្ហារបស់ក្រុមឡានដឹកដី ដឹកខ្សាច់ ថ្ម គ្រួសទាំងនោះ ពេលរថយន្តបើកបរមិនគ្របឲ្យត្រឹមត្រូវតាមលក្ខណ:បច្ចេកទេស បើកមិនប្រណីមិនអាសូរដល់ពលរដ្ឋជិះកង់ ជិះម៉ូតូនោះទេ ។ ពលរដ្ឋមានការរិះគន់យ៉ាងខ្លាំងដោយសារតែមន្ត្រីនគរបាលខេត្តកណ្ដាលមិនអើពើសោះឡើយ ។

ទីតាំងដែលបិទផ្អាកបណ្តោះអាសន្ននោះគឺនៅភូមិតោកម៉ា ឃុំកណ្តោក ស្រុកកណ្តាលស្ទឹង ខេត្តកណ្តាល ។

គួរបញ្ចាក់ថា កន្លងទៅថ្មីៗនេះ លោក ឌិត ទីណា ក៏បានបញ្ចាក់ច្បាស់ថា កាតព្វកិច្ចឃាត់ និង ពិន័យទៅលើក្រុមឡានដែលកំពុងបំពានច្បាប់រ៉ែ និងច្បាប់ចរាចរណ៍នោះ ជាកាតព្វកិច្ចរបស់នគរបាល ខណ:ដែលពលរដ្ឋជាច្រើន បានរិះគន់ខ្លាំងៗទៅលើភាពអសកម្មចំពោះការមិនអើពើនូវទង្វើបើកបររបស់ក្រុមឡានដឹកដី ដឹកខ្សាច់ ថ្មគ្រួសនោះ ។

យ៉ាងណាក៏ដោយ ពលរដ្ឋស្នើម្ដងហើយម្ដងទៀត ចំពោះឆន្ទ:របស់អស់លោកមន្ត្រីនគរបាលចរាចរណ៍ខេត្តកណ្ដាល និង ជំនាញរ៉ែនិងថាមពល មេត្តាបង្កើនការយកចិត្តទុកដាក់ពីសុខទុក្ខរបស់ប្រជារាស្ត្រឲ្យបានខ្លាំងក្លាជាងមុនផង ៕

មតិយោបល់