ភ្នំពេញ: ភ្នាក់ងារPost Newsបានឲ្យដឹងថា បើយោងតាមការឲ្យដឹងរបស់លោក គឹម សន្តិភាព អ្នកនាំពាក្យក្រសួងយុត្តិធម៌ នៅក្នុងឱកាសចូលឆ្នាំប្រពៃណីជាតិខ្មែរខាងមុខនេះ គណ:កម្មការថ្នាក់ជាតិបានទទួលសំណើរពីគណ:កម្មការថ្នាក់ខេត្តចំនួន១៧ និងមណ្ឌលអប់រំកែប្រែចំនួន ៤ ដែលស្នើសុំបន្ធូរបន្ថយទោស និងលើកលែងទោសឲ្យទណ្ឌិតសរុបចំនួន៣៩១នាក់ ដោយនៅក្នុងនោះមានទណ្ឌិតជាស្រ្តីចំនួន ២៤នាក់ ក្នុងនោះការស្នើរបន្ធូរបន្ថយទោសចំនួន ៣១៤នាក់ និងស្នើលើកលែងទោសចំនួន៧៧នាក់ ។

ប្រភពដដែលបន្តថា ជាលទ្ធផលនៃកិច្ចប្រជុំគណ:កម្មការជាតិពិនិត្យបញ្ជីទណ្ឌិតស្នើសុំបន្ធូរបន្ថយទោសនារសៀលថ្ងៃទី៣០ ខែមីនា ឆ្នាំ២០១៧ នេះ បានពិនិត្យ និងសម្រេចរួចហើយសម្រាប់សំណើពីគណ:កម្មការថ្នាក់ខេត្តចំនួន១២ រីឯសំណើរដែលនៅសល់រួមមានគណ:កម្មការថ្នាក់ខេត្តចំនួន៥ និងមណ្ឌលអប់រំកែប្រែចំនួន៤ ទៀត គណ:កម្មការថ្នាក់ជាតិនឹងបន្តកិច្ចប្រជុំរបស់ខ្លួននារសៀលថ្ងៃទី៣១ ខែមីនា ឆ្នាំ២០១៧ ស្អែកនេះ ។

ទោះជាយ៉ាងនេះក្តីនាពេលកន្លងទៅប្រមុខ រាជរដ្ឋាភិបាលកម្ពុជាលោក ហ៊ុន សែន ធ្លាប់បានព្រមានថា មិនឲ្យមានការដាក់ស្នើលើកលែងទោស ឬបន្ធូរ បន្ថយទោស ចំពោះទណ្ឌិត ដែលមានបទល្មើស ប្លន់ប្រដាប់អាវុធ និងឈ្មួញ គ្រឿងញៀនធំៗ ឬបើស្នើមកសម្តេចជាអ្នកពិនិត្យមើលផ្ទាល់ម្តងមួយៗដោយប្រុងប្រយ័ត្នបំផុត ព្រោះសម្តេចលែងទុកចិត្ត ។

ប្រភពដដែលបន្តថា ការប្រុងប្រយ័ត្ននេះព្រោះតែជនសង្ស័យជាចោរប្លន់ និងជួញដូរគ្រឿងញៀន ភាគច្រើនជាមុខសញ្ញាចាស់ នៅពេលសមត្ថកិច្ចចាប់បាន ខណ:មានអ្នកដែលកែប្រែបានតិចតួចពេលទទួលបានការលើកលែងទោស ។

ក្នុងនោះ លោក ហ៊ុន សែន បានសង្កត់ធ្ងន់ថា ទណ្ឌិតជាចោរប្លន់ និងអ្នកជួញដូរគ្រឿងញៀន ចេញពីគុកលឿនជាងទណ្ឌិតធម្មតា រហូតមានជនជាប់ឃុំខ្លះត្រូវតុលាការឃុំលើសនីតិវិធីក៏មាន ។

សូមបញ្ជាក់ថា ក្នុងមួយៗឆ្នាំកម្ពុជា បានលើកលែង និងបន្ធូរបន្ថយទោសដល់ទណ្ឌិតចំនួន ៣លើក រួម មាននៅ បុណ្យចូលឆ្នាំ បុណ្យអុំទូក និង បុណ្យពិសាខបូជា ហើយការលើកលែង និង បន្ធូរបន្ថយទោសដល់ទណ្ឌិត ធ្វើឡើងតាម សំណើរបស់នាយករដ្ឋមន្ត្រី ទៅព្រះមហាក្សត្រ ៕