កណ្ដាលៈ នៅរសៀលថ្ងៃទី២៨ ខែមេសា ឆ្នាំ២០១៧ លោក សូ សារិន ប្រធានលេខាធិការដ្ឋាន និងជាអ្នកនាំពាក្យសាលាដំបូងខេត្តកណ្តាល បានមានប្រសាសន៍តាមទូរសព្ទប្រាប់ភ្នាក់ងារ Post News ថា សំណុំរឿងព្រហ្មទណ្ឌលេខ១១១៩ អ.ក ចុះថ្ងៃទី៧ ខែវិច្ឆិការ ឆ្នាំ២០១៦ ដែលនគរបាលស្រុកស្អាងទាំង៣នាក់បាន ប្រព្រឹត្តខុស នាំគ្នាវាយ សួរចម្លើយទៅលើបុរសម្នាក់ បណ្ដាលឲ្យស្លាប់និងម្នាក់ទៀតរងរបួសធ្ងន់កាលពីថ្ងៃទី២២ ខែតុលា ឆ្នាំ២០១៦ នៅផ្លូវចូលវត្តធនមន្ន ស្ថិតភូមិស្វាយតានី ឃុំព្រែកគយ ស្រុកស្អាង ខេត្តកណ្តាលនោះ ឥឡូវនេះគឺនៅដំណាក់កាលស៊ើបសួររបស់លោកចៅក្រម ហុក វ៉ាន់ធីណា ។

លោក សូ សារិន បានប្រាប់បន្ថែមទៀតថា ចំពោះអ្នកដែលត្រូវបានចៅក្រមកោះហៅមកសាកសួរនោះ គឺជានីតិវិធីរបស់លោកចៅក្រម។ ដោយឡែកចៅក្រមស៊ើបសួរមើលឃើញថាមានការពាក់ពន្ធ័ គឺគាត់កោះហៅអ្នកនោះដើម្បីមកឆ្លើយ។ ចំពោះចំណាត់ការយ៉ាងណាទៀត គឺសម្រេចនៅលើលោកចៅក្រម។

សូមបញ្ជាក់ថា តាមប្រភពព័ត៌មានពីមន្ត្រីនគរបាលខេត្តកណ្ដាលបានឲ្យដឹងថា មន្ត្រីនគរបាលស្រុកស្អាង៤រូប ចូលមកបំភ្លឺចំពោះមុខលោកចៅក្រម នៅថ្ងៃទី២៦-២៧ខែមេសា ឆ្នាំ២០១៧ មានលោកវរសេនីយ៍ឯក សេង សុជាតិ អធិការ លោក លន ចន្ថា អធិការរងទទួលបន្ទុកនគរបាលយុត្តិធម៌ លោក នៅ ប៊ុណ្ណា នាយផ្នែកព្រហ្មទណ្ឌនិងមន្ត្រីព្រហ្មទណ្ឌ១រូបទៀត។

កាលពីខែមីនា ឆ្នាំ២០១៧ នគរបាលស្រុកស្អាង៣នាក់ ម្នាក់ជាអធិការរង និង២នាក់ ជានាយ និងនាយរងផ្នែកត្រូវបាន ដកតួនាទី និងត្រូវបណ្ដេញ ចេញពីក្របខណ្ឌ នគរបាលជាតិ។

ការបណ្ដេញចេញនេះ គឺត្រូវបានគេដឹងថា បន្ទាប់ពីនគរបាលទាំង៣នាក់បាន ប្រព្រឹត្តខុស នាំគ្នាវាយសួរចម្លើយទៅលើ បុរសម្នាក់បណ្ដាលឲ្យស្លាប់ និងម្នាក់ទៀត រងរបួសធ្ងន់ ហើយរត់គេចខ្លួនមិនទទួលខុសត្រូវ ចំពោះមុខច្បាប់ និងមិនចូលបម្រើការងារច្រើនខែ។ សេចក្តីប្រកាស របស់ក្រសួងមហាផ្ទៃ ចុះហត្ថលេខាដោយ ឧបនាយយករដ្ឋមន្ត្រី ស ខេង បានចេញប្រកាសបណ្ដេញចេញឲ្យផុតពីក្របខណ្ឌនគរបាលជាតិ និងត្រូវបានអនុវត្តវិន័យមន្ត្រីនគរបាលស្រុកស្អាងដោយរូបភាពដកហូត ឋានន្តរសក្ដិ និងបណ្ដេញចេញឲ្យផុតពីក្របខណ្ឌនគរបាលជាតិ។

ទី១លោកវរៈសេនីយ៍ទោ ភក្ដី វិទូ អត្តលេខ៥៤៤៤៣ អធិការរងស្រុកស្អាងទទួលបន្ទុកផែនអន្តោប្រវេសន៍ ទី២លោក ឆៃ ស៊ីណា អត្តលេខ៥៥៣៣០ នាយរងផ្នែកអន្តោប្រវេសន៍ និងទី៣ លោកអនុសេនីយ៍ទោ ឃាង សុងថេង អត្តលេខ៥៨២៨២។

គួររំលឹកថា កាលពីថ្ងៃទី២២ តុលា ឆ្នាំ២០១៦ នៅផ្លូវចូលវត្តធនមន្ន ស្ថិតភូមិស្វាយតានី ឃុំព្រែកគយ ស្រុកស្អាង ខេត្តកណ្តាល។លោក ឆៃ ស៊ីណា នាយរងផ្នែកអន្តោប្រវេសន៍ បានចោទប្រកាន់ ជនរងគ្រោះឈ្មោះ ចំរើន សីហា ភេទប្រុស អាយុ២០ ឆ្នាំជាង មុខរបរជាងសំណង់ និង ឈ្មោះទិត្យ លាភ ភេទប្រុស អាយុជាង២០ឆ្នាំ ដូចគ្នា ស្នាក់នៅភូមិតានង់ ឃុំក្រាំងអំពិល ស្រុកសំរោងទង ខេត្តកំពង់ស្ពឺ ថាបានបើកម៉ូតូវ៉ា និងកៀរម៉ូតូខ្លួនក្នុងបំណងរកប្លន់ខ្លួន។ ពេលនោះឈ្មោះឆៃ ស៊ីណា បាន ស្ទាក់ម៉ូតូ ជនរងគ្រោះទាំង២ឲ្យឈប់ និងបានដកកាំភ្លើងភ្ជង់ឲ្យអ្នកទាំងពី នៅឲ្យស្ងៀម ហើយឈ្មោះ ឆៃ ស៊ីណា បានតេទូរសព្ទ ហៅ ឈ្មោះ ភក្តី វិទូ និងឈ្មោះ ឃាង សុងថេង ជានគរបាលស្រុកស្អាងដែរឲ្យមកជួយចាប់អ្នកទាំង២។ ពេលមកដល់ក៏មានប្រជាជននៅទីនោះបាន វាយលើជនរងគ្រោះខ្លះដែរ។ ពេលចាប់បញ្ជូន អ្នកទាំង២ មកដល់អធិការដ្ឋានស្រុក នគរបាលទាំង៣នាក់ខាងលើ បាននាំគ្នាវាយសួរចម្លើយ ជនរងគ្រោះ ទាំង២នាក់ ដោយចោទប្រកាន់ថាជាចោរ តែជនរងគ្រោះ មិនឆ្លើយសារភាពដូចការចោទប្រកាន់ នគរបាលទាំង៣នាក់ខាងលើ បានវាយដំជនរងគ្រោះ រហូតដល់របួសធ្ងន់ តែជនរងគ្រោះ ឈ្មោះ ចំរើន សីហា បានរងរបួសធ្ងន់ជាង ។ បន្ទាប់មក នគរបាលស្រុកស្អាង បានបញ្ជូន អ្នកទាំង២ទៅព្យាបាល នៅពេទ្យ បង្អែកស្រុកស្អាង ។ដោយស្ថានភាព របួសធ្ងន់ពេក ជនរងគ្រោះទាំង២នាក់ ត្រូវបាន គេបញ្ជូនមក ពេទ្យជ័យជំនះ ក្រុងតាខ្មៅ ពេលមកដល់ ជនរងគ្រោះឈ្មោះចំរើន សីហា បានស្លាប់ ចំណែក ឈ្មោះទិត្យ លាភ រងរបួសធ្ងន់តែ ព្យាបាល បាន ធូរស្រាល។ ក្រោយពីដឹងដំណឹងថា ជនរងគ្រោះ ឈ្មោះចំរើន សីហា បានស្លាប់ នគរបាលទាំង៣នាក់ខាងលើ បានគេចខ្លួនបាត់តែម្ដង។

បន្ទាប់មកសមត្ថកិច្ចនគរបាលខេត្ត បានកសាងសំណុំរឿង បញ្ជូនទៅកាន់តុលាការ និងរាយការណ៍តាមលំដាប់ថ្នាក់ ។ ចាប់តាំងពីកើតហេតុនោះមក នគរបាលទាំង៣នាក់ខាងលើ បានគេចខ្លួន មិនចូលមកបម្រើការងារទេក្រោយមក ក៏ត្រូវបាន ក្រសួងមហាផ្ទៃ សម្រេចដកតួនាទីនិង បណ្ដេញ ចេញ នគរបាលទាំង៣នាក់ ខាងលើ ពីក្របខណ្ឌនគរបាលជាតិ ហើយសំណុំរឿងនេះ ក៏កំពុងស្ថិតនៅ ក្នុងចំណាត់ការរបស់តុលាការផងដែរ ៕