ព័ត៌មានបច្ចេកវិទ្យា

ស្ងាត់ៗ! Apple លួចសាកល្បងបច្ចេកវិទ្យាស្វ័យបើកបរលើរថយន្ត Lexus RX មួយគ្រឿង

រថយន្ត Lexus Rx450h បំពាក់ឧបករណ៍បច្ចេកវិទ្យាចាប់សញ្ញាដ៏ធំមួយ ត្រូវបានគេប្រទះឃើញបរចេញពីរោងចក្ររបស់ក្រុមហ៊ុន Apple មួយកន្លែង ក្នុងតំបន់ Silicon Valley នៅថ្ងៃសុក្រនេះ ដែលវាអាចឱ្យគេជឿជាក់ថា ក្រុមហ៊ុនបច្ចេកវិទ្យាយក្សអាមេរិក​ កំពុងដាក់សាកល្បងរថយន្តបំពាក់ប្រព័ន្ធស្វ័យបើកបររបស់ខ្លួន។

សកម្មភាពនេះ ស្តែងឡើងតែពីរសប្តាហ៍ប៉ុណ្ណោះ​ ក្រោយពីក្រុមហ៊ុន Apple ទទួលបានការអនុញ្ញាតការដាក់សាក​ល្បងរថយន្តស្វ័យប្រវត្តិកម្មចំនួន ៣ ហើយនេះអាចជាការចាប់ផ្តើមដំបូងប្រតិបត្តិការលើកដំបូងរបស់ក្រុមហ៊ុន។ នេះបើយោងតាមរបាយការណ៍ពីគេហទំព័ររបស់នាយកដ្ឋានយានយន្តរដ្ឋ កាលីហ្វ័រនីយ៉ា។

ប្រភពពីគេហទំព័រ Bloomberg News បានប្រទះឃើញរថយន្ត Lexus មួយគ្រឿងនោះ នៅលើដងផ្លូវក្នុងតំបន់ Silicon Valley ដោយមានបំពាក់រ៉ាដា និងការមេរ៉ា ព្រមជាមួយប្រព័ន្ធចាប់សញ្ញា LiDAR ដែលទំនើបបំផុតពីក្រុមហ៊ុន Velodyne លើដំបូលរថយន្ត។

បើមើលតាមលក្ខណ:នៃប្រព័ន្ធនេះ គឺវាត្រូវបានគេមើលឃើញថា មិនខុសពីប្រព័ន្ធស្វ័យប្រវត្តិកម្មដែលក្រុមហ៊ុនផ្សេងៗកំពុងប្រើសម្រាប់បំពាក់លើរថយន្តនោះទេ។ ប្រាកដណាស់ គេពិតជាមិនអាចឃើញកម្មវិធីដែលនៅពីក្រោយប្រព័ន្ធរ៉ាដា និងកាមេរ៉ាទាំងនោះឡើយ បើទោះបីជារូបថតបានបង្ហាញយ៉ាងច្បាស់ថា Apple កំពុងដាក់សាកល្បងរថយន្តគ្មានមនុស្សបើកនៅលើដងផ្លូវក៏ដោយ។ ម្យ៉ាងទៀត ពួកគេក៏មិនប្រាប់ឱ្យដឹងអ្វីច្រើនអំពីគ្រោងការកម្មវិធី Apple Car ឬ CarOS ថាដំណើរការឈានដល់កម្រិតណានោះដែរ៕

ប្រភពព័ត៌មាន: cnet

មតិយោបល់