ភ្នំពេញៈ សមត្ថកិច្ចនគរបាលខណ្ឌដូនពេញ បានចុះទៅបង្រ្កាបក្រុមអ្នកចែកចាយថ្នាំញៀន នៅបណ្តោយផ្លូវR៦ ទាំងយប់ ឃាត់ខ្លួនបានជនសង្ស័យ៣នាក់ ដកហូតបានថ្នាំញៀនជាង២០កញ្ចប់។

ការបង្ក្រាបនេះបានធ្វើឡើងកាលពីវេលាម៉ោង១និង២០នាទី យប់ឈានចូលថ្ងៃទី៤ ខែឧសភា ឆ្នាំ២០១៧ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

តាមប្រភពព័ត៌មានពីសមត្ថកិច្ចជំនាញបានឲ្យដឹងថា ក្នុងការចុះបង្ក្រាបលើកនេះ គឺសមត្ថកិច្ច បានទទួលដំណឹងយ៉ាងច្បាស់ថា នៅបណ្តោយផ្លូវR៦នេះ គឺសម្បូរក្រុមអ្នកចែកចាយ និងប្រើប្រាស់ថ្នាំញៀនយ៉ាងសកម្ម ទើបមកដល់វេលាកើតហេតុ ក្រុមសមត្ថកិច្ចជំនាញរបស់ខណ្ឌដូនពេញ បានដឹកនាំកម្លាំងចុះមកបង្រ្កាបបានជនសង្ស័យប្រុសស្រីចំនួន៣នាក់។

លោកបានបន្តទៀតថា ក្នុងការបង្រ្កាបលើកនេះ មានជនសង្ស័យម្នាក់ ក្នុងចំណោមជនសង្ស័យទាំង៣នាក់នោះ បានតដៃជាមួយនឹងកម្លាំងសមត្ថកិច្ច គឺបានយកដាវស៊ាំម៉ូវ៉ៃ កាប់ប្រហារមកលើសមត្ថកិច្ចទៀតផង ប៉ុន្តែទោះជាជនសង្ស័យខំព្យាយាមតដៃនឹងសមត្ថកិច្ច ដែលមានបំណងចង់រត់គេចយ៉ាងណា ក៏ត្រូវបានសមត្ថកិច្ចចាប់ខ្លួនជាប់បានដដែល។

ចំណែកជនសង្ស័យដែលបានធ្វើសកម្មភាពកាប់ប្រហារទៅលើសមត្ថកិច្ចបានអះអាងថា ហេតុផលដែលគាត់បានធ្វើសកម្មភាពកាប់ប្រហារទៅលើសមត្ថកិច្ចនេះ ព្រោះតែគាត់ស្មានថា មានគេមកវាយគាត់យកទូរសព្ទដូចជាលើកមុន អញ្ចឹងហើយ គាត់ក៏កាប់ប្រហារមុនទៅ។

ចំណែកវត្ថុតាងដែលសមត្ថកិច្ចធ្វើការឃាត់បានរួមមាន៖ ថ្នាំញៀនប្រភេទម៉ាទឹកកក ចំនួន២១កញ្ចប់តូច នឹងដាវស៊ាំម៉ូវ៉ៃចំនួន១ដើម។

បច្ចុប្បន្នជនសង្ស័យទាំង៣នាក់ ត្រូវបានសមត្ថកិច្ចជំនាញបញ្ជូនខ្លួនទៅអធិការដ្ឋានគរបាលខណ្ឌដូនពេញដើម្បីបញ្ជូនខ្លួនទៅកាន់តុលាការ ចាត់ការបន្តតាម នីតិវីធីច្បាប់៕