ព័ត៌មានជាតិ

ឃាត់ខ្លួនជនសង្ស័យ៥នាក់ ដកហូតថ្នាំញៀន៣កញ្ចប់និងឧបករណ៍ប្រើប្រាស់មួយចំនួន

ភ្នំពេញ: ជនសង្ស័យ ៥នាក់ ត្រូវបានឃាត់ខ្លួន ក្នុងប្រតិបត្តិការបង្ក្រាបគ្រឿងញៀនដោយដកហូតថ្នាំញៀន៣កញ្ចប់ និងឧបករណ៍ប្រើប្រាស់មួយចំនួន។

ប្រតិបត្តិការនេះ ដឹកនាំដោយអធិការរងខណ្ឌទទួលបន្ទុកផ្នែកព្រហ្មទណ្ឌលោក អ៊ីវ ឈុនផេង និងនាយផ្នែកគ្រឿងញៀន លោកអនុសេនីយ៍ត្រី ម៉ៅ ចាន់ថុន បង្ក្រាបកាលពីវេលាម៉ោង ១និង៣០នាទី រសៀល ថ្ងៃទី៤ ខែឧសភា ឆ្នាំ២០១៧ នៅចំណុចក្នុងវត្តញាណរង្សី ផ្លូវបេតុង ក្រុម៤ ភូមិទួលគោក សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

លោក ម៉ៅ ចាន់ថុន នាយផ្នែកប្រឆាំងបទល្មើសគ្រឿងញៀនខណ្ឌ បានឲ្យដឹងថា ក្នុងប្រតិបត្តិការនេះ គឺកម្លាំងលោកបានធ្វើការបើកប្រតិបត្តិការស្រាវជ្រាវរហូតឈានដល់ការចុះបង្ក្រាបទីតាំងក្នុងវត្តញាណរង្សី នេះតែម្តង។ ដោយក្នុងពេលចុះបង្ក្រាបនេះ សមត្ថកិច្ចយើងបានឃាត់ខ្លួនជនសង្ស័យចំនួន ៥នាក់ ដកហូតថ្នាំញៀន ៣កញ្ចប់តូច និងឧបករណ៍ប្រើប្រាស់មួយចំនួន ហើយសមត្ថកិច្ចយើងបាននាំខ្លួនជនសង្ស័យខាងលើទៅកាន់ប៉ុស្តិ៍នគរបាលទួលសង្កែ ដើម្បីធ្វើការសាកសួរ។

លោក ម៉ៅ ចាន់ថុន បានបន្តទៀតថា ជនសង្ស័យទាំង ៥នាក់ខាងលើនេះ ទី១-ឈ្មោះ មិល ធីតា ភេទប្រុស អាយុ ៣២ឆ្នាំ មុខរបរ មិនពិតប្រាកដ មានទីលំនៅផ្ទះគ្មានលេខ ផ្លូវលំ ក្រុម៤ ភូមិទួលគោក សង្កាត់ទួលសង្កែ, ទី២-ឈ្មោះ ម៉ូ វ៉ាន់នី ភេទប្រុស អាយុ ១៨ឆ្នាំ មុខរបរ មិនពិតប្រាកដ មានទីលំនៅផ្ទះគ្មានលេខ ផ្លូវបេតុង ក្រុម៤ ភូមិទួលគោក សង្កាត់ទួលសង្កែ, ទី៣-ឈ្មោះ ផៃ បូរី ភេទប្រុស អាយុ ១៨ឆ្នាំ មុខរបរ មិនពិតប្រាកដ មានទីលំនៅក្នុងបុរីកម្មករ សង្កាត់ឃ្មួញ ខណ្ឌសែនសុខ, ទី៤-ឈ្មោះ ពេញ ចាន់រស្មី ភេទប្រុស អាយុ ២៥ឆ្នាំ មុខរបរ និងទីលំនៅ មិនពិតប្រាកដ និងទី៥-ឈ្មោះ មិល ស៊ីឌឿន ភេទប្រុស អាយុ ៣០ឆ្នាំ មុខរបរ មិនពិតប្រាកដ មានទីលំនៅផ្ទះគ្មានលេខ ផ្លូវបេតុង ក្រុម៤ ភូមិទួលគោក សង្កាត់ទួលសង្កែ ខណ្ឌឫស្សីកែវ។

បច្ចុប្បន្នជនសង្ស័យទាំង ៥នាក់ខាងលើ រួមនឹងវត្ថុតាងត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕

មតិយោបល់