ភ្នំពេញ: នារីម្នាក់ ត្រូវក្រុមចោរធ្វើសកម្មភាពឆក់យកកាបូបលុយបានសម្រេចគិតទាំងលុយនិសម្ភារ:អស់ជិត៣០០ដុល្លារ ហើយគេចខ្លួនដោយសុវត្ថភាព ខណ:ដែលនាងចេញពីធ្វើការនៅក្រុមហ៊ុនម៉ាស់ស្តាដោយធ្វើដំណើរតាមម៉ូតូឌុបម្តាយនៅពីក្រោយផងនោះ បណ្តាលឲ្យរងរបួសទៀតផង។
ហេតុការណ៍ឆក់កាបូបនេះបានកើតឡើងកាលពីវេលាម៉ោង១០និង៣០នាទី ព្រឹកថ្ងៃទី១៣ ខែឧសភា ឆ្នាំ២០១៧ នៅចំណុចមុខសាលាខណ្ឌសែនសុខ តាមបណ្តោយផ្លូវភ្នំពេញហាន់ណូយ ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ។
នារីរងគ្រោះមានឈ្មោះ នាក់ សុខា អាយុ២៨ឆ្នាំ មុខរបរបុគ្គលិកក្រុមហ៊ុនម៉ាស់ស្តា ស្នាក់នៅផ្ទះលេខ៤៥២ភូមិរោងចក្រ សង្កាត់ភ្នំពេញថ្មី ខណ្ឌសែនសុខ។
តាមសម្តីនារីរងគ្រោះបានរៀបរាប់ប្រាប់សមត្ថកិច្ចថា មុនពេលកើតហេតុខ្លួនបានចេញពីកន្លែងធ្វើការក្រុមហ៊ុនខាងលើ ដោយជិះម៉ូតូ១គ្រឿងម៉ាកគុបជ្រុង៥០ ពណ៌ស្លែ ពាក់ស្លាកលេខ ម ២៩០៤ ភព១ ដោយឌុបម្តាយពីក្រោយក្នុងទិសដៅពីត្បូងទៅជើង ដោយស្ពាយកាបូបដែលក្រុមចោរឆក់នោះនៅពីមុខ លុះមកដល់ចំណុចមុខសាលាខណ្ឌសែនសុខ កន្លែងកើតហេតុ ស្រាប់តែលេចមុខក្រុមជនសង្ស័យមានគ្នា២នាក់ បានជិះម៉ូតូ១គ្រឿងមិនចាំម៉ាក មកពីក្រោយមកក្បែរហើយបានធ្វើសកម្មភាពឆក់យកកាបូបនោះបានសម្រេច បណ្តាលឲ្យនាងដួលរងរបួសស្រាល ហើយក្រុមជនសង្ស័យបានជិះរត់គេចខ្លួនបាត់។ ពេលនោះនាងក៏បានស្រែកឲ្យគេជួយដែរ តែពុំមានអ្នកជួយទាន់ពេលទេព្រោះពួកវាជិះម៉ូតូលឿនដូចហោះ។
ក្រោយកើតហេតុ នារីរងគ្រោះបានត្រឹមតែទៅដាក់ពាក្យបណ្តឹងនៅប៉ុស្តិ៍នគរបាលភ្នំពេញថ្មីទាំងសោកស្តាយតែប៉ុណ្ណោះ៕
មតិយោបល់