កំពង់ស្ពឺ: លោកតាប់ លនស្នងការរងផែនសណ្តាប់ធ្នាប់ចរាចរណ៍នៃស្នងការនគរបាលខេត្តកំពង់ស្ពឺ បានប្រាប់ Post News ថា មានករណីគ្រោះថ្នាក់ចរាចរណ៍បង្កឡើងដោយឡានបែនដឹកថ្មបុកឡានការ៉េ រេចង្កូតទៅបុកសាំយ៉ុង ប្រភេទទេសចរណ៍ បណ្តាលឲ្យស្លាប់៤នាក់ និងរបួសធ្ងន់ ស្រាល១៧នាក់ ស្រី១០នាក់។

ហេតុការណ៍នេះបានកើតឡើងកាលពីវេលាម៉ោង៥និង៥៥នាទី ព្រឹកថ្ងៃទី១៥ ខែឧសភា ឆ្នាំ២០១៧ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៤០-៤១ ស្ថិតនៅភូមិរំលោង ឃុំវល្លិសរ ស្រុកសំរោងទងខេត្តកំពង់ស្ពឺ។

ប្រភពដដែលបន្តថា មុនពេលកើតហេតុ គេឃើញមានរថយន្ត១គ្រឿងម៉ាកហ៊ីយ៉ានដាយ ពណ៌ស (ឡានបែនដឹកថ្ម) ពាក់ស្លាកលេខ ភ្នំពេញ 3D-2933 មិនស្គាល់អ្នកបើកបរ(ចុះរត់គេចខ្លួនបាត់) បើកបរពីលិចទៅកើតមកដល់ចំណុចកើតហេតុខាងលើ បានបុករថយន្ត១គ្រឿង ម៉ាកហ៊ីយ៉ាន់ដាយ ពណ៌ខៀវ (ឡានការ៉េ) ពាក់ស្លាកលេខ ភ្នំពេញ 2J-0849 បើកបរដោយឈ្មោះ រឹត ភេទប្រុស អាយុ៣០ឆ្នាំ រស់នៅភូមិត្បែស ឃុំវល្លិសរស្រុកសំរោងទង បើកបរបញ្ច្រាសទិសគ្នា បណ្ដាលឲ្យក្រឡាប់ផ្ងារជើង រួចរថយន្តបែនដឹកថ្មក៏រេចង្កូតទៅបុករថយន្ត១គ្រឿងទៀត ម៉ាកសាំយ៉ុង(ប្រភេទទេសចរណ៍) ពាក់ស្លាកលេខ ភ្នំពេញ 2Q-4362 បើកបរពីកើតមកលិច បណ្ដាលឲ្យមនុស្ស៤នាក់ស្លាប់និងរបួសធ្ងន់ ស្រាល១៧នាក់ ក្នុងនោះស្រី១០នាក់។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយករថយន្តទាំង៣គ្រឿងមករក្សាទុក នៅអធិការដ្ឋាននគរបាលស្រុកសំរោងទង៕