ភ្នំពេញ: កម្លាំងសមត្ថកិច្ច នៃអធិការដ្ឋាននគរបាលខណ្ឌឫស្សីកែវ បានធ្វើការចុះបង្ក្រាបទីតាំងជួញដូរ និងចែកចាយគ្រឿងញៀន មួយកន្លែង ដោយជាក់ស្តែងសមត្ថកិច្ចយើងធ្វើការឃាត់ខ្លួនជនសង្ស័យដែលជាជនជាតិវៀតណាមម្នាក់ ព្រមទាំងដកហូតថ្នាំញៀន១៩កញ្ចប់ និងជញ្ជីងថ្លឹងចំនួន។ ប្រតិបត្តិការណ៍នេះបានធ្វើឡើងកាលពីវេលាម៉ោង ៥និង៤០នាទីល្ងាច ថ្ងៃទី១៨ ខែឧសភា ឆ្នាំ២០១៧ ដែលនៅចំណុចផ្ទះគ្មានលេខ ក្រុម៤ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភំ្នពេញ។

លោក ម៉ៅ ចាន់ថុន នាយផ្នែកប្រឆាំងបទគ្រឿងញៀនខណ្ឌ បានឲ្យដឹងថា ជនសង្ស័យម្នាក់ដែលសមត្ថកិច្ចយើងធ្វើការឃាត់ខ្លួននេះ គឺជាមុខសញ្ញាជួញដូរ និងចែកចាយគ្រឿងញៀន ដែលកម្លាំងសមត្ថកិច្ចយើងបានធ្វើការស្រាវជ្រាវរហូតឈានដល់ការខ្លួនបានតែម្តង។

ក្រោយពីសមត្ថកិច្ចយើងធ្វើការឃាត់ខ្លួនជនសង្ស័យខាងលើរួចមក សមត្ថកិច្ចយើងក៏បានបន្តទៅធ្វើការឆែកឆេរទីតាំងផ្ទះជនសង្ស័យដែលស្នាក់នៅនោះ ដោយពេលសមត្ថកិច្ចយើងចុះឆែកឆេរបានរកឃើញវត្ថុតាងមួយចំនួនរួមមាន ម្សៅក្រាមពណ៌សថ្លាចំនួន ១៩កញ្ចប់ ជាប្រភេទ ម៉ាទឹកកក, ជញ្ជីងសម្រាប់ថ្លឹងគ្រឿងញៀនចំនួន មួយគ្រឿង, ថង់សម្រាប់ច្រកមួយចំនួន, ដាវកែច្នៃចំនួន មួយដើម និងឧបករណ៍ប្រើប្រាស់មួយចំនួន។

លោក ម៉ៅ ចាន់ថុន បានបន្តថា ជនសង្ស័យដែលឃាត់ខ្លួនមានឈ្មោះ ង្វៀង វិនចូវទឹង ភេទប្រុស អាយុ ៤១ឆ្នាំ ជនជាតិវៀតណាម មុខរបរ មិនពិតប្រាកដ (ជួញដូរគ្រឿងញៀន) ស្នាក់នៅផ្ទះជួលគ្មានលេខ ក្រុម៤ ភូមិឡកំបោរ សង្កាត់ស្វាយប៉ាក។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវសមត្ថកិច្ចបញ្ជូនខ្លួនទៅកាន់អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕