ភ្នំពេញ: រថយន្ដកាមរីហាយព្រីតដែលបើកបរដោយបុរសម្នាក់ បានបង្កគ្រោះថ្នាក់ចរាចរ បួនកន្លែងផ្សេងគ្នា ដោយរថយន្តនេះបានបុករះតាំងពីខណ្ឌចំកាមនហើយព្យាយាមបើកគេចខ្លួនដល់ខណ្ឌទួលគោកបុកម៉ូតូ២គ្រឿងទៀត បណ្ដាលឲ្យរបួសធ្ងន់២នាក់ទៀត ហើយព្យាយាមបើករហូតមកដល់ជិតអធិការខណ្ឌទួលគោកទៅបុករថយន្ដកាមរីបាឡែន១គ្រឿងទៀត ដែលចតនៅចិញ្ចើមផ្លូវ ទើបរថយន្ដទៅមុខលែងរួចឃាត់បានតែម្ដង។ ហើយប្រជាពលរដ្ឋនាំគ្នាព្រួតវាយកម្ទេចរថយន្ដខូចខាតស្ទើទាំងស្រុងកាលពីវេលាម៉ោង១០និង១៥នាទីយប់ ថ្ងៃទី១៩ ខែឧសភា ឆ្នាំ២០១៧ នៅតាមបណ្ដោយផ្លូវលេខ២៦១ ក្នុងសង្កាត់បឹងសាឡាង ខណ្ឌទួលគោក ។

តាមសាក្សីដែលឃើញហេតុការណ៍និងដេញតាមពីក្រោយបានឲ្យដឹងថា មុនពេលកើតហេតុ គឺរថយន្ដបង្កម៉ាកកាមរីហាយព្រីត ពណ៌ស្ករ ពាក់ស្លាកលេខ ភ្នំពេញ2AB-1990 បើកបរដោយបុរសម្នាក់មិនស្គាល់អត្តសញ្ញាណ បានបើកជ្រុលទៅបុកម៉ូតូ១គ្រឿង នៅម្ដុំបឹងកេងកងដោយខូចខាតបន្តិតបន្ទួចប៉ុណ្ណោះ តែមិនបានឈប់ដោះស្រាយនោះទេ។

ប្រភពដដែលបានបន្តថា ដោយឃើញរថយន្ដមិនព្រមឈប់ដោះស្រាយក៏នាំគ្នាដេញតាមពីក្រោយរហូតមកដល់ជិតផ្សារដេប៉ូក៏បុកម៉ូតូ២គ្រឿងទៀតបណ្ដាលឲ្យមនុស្ស២នាក់រងរបួសធ្ងន់ ហើយរថយន្ដនៅតែមិនឈប់ដោយបើករត់រហូតមកដល់ផ្លូវលេខ២៦១ ជិតអធិការដ្ឋាននគរបាលខណ្ឌទួលគោក រថយន្ដក៏ទៅបុករថយន្ដកាមរីបាឡែន១គ្រឿងទៀត ដែលម្ចាស់ឈប់នៅលើចិញ្ចើមផ្លូវទើបរថយន្ដទៅមុខលែងរួច។
ក្រោយពីបុកគៀបជាប់គ្នាហើយម្ចាស់រថយន្ដបើកទ្វាររថយន្ដចុះរត់គេចខ្លួនចូលក្នុងហាងខារ៉ាអូខេដែលនៅក្បែរនោះ ព្រោះខ្លាចប្រជាពលរដ្ឋព្រួតគ្នាវាយ។ ចំណែករថយន្ដបង្កវិញប្រជាពលរដ្ឋនាំគ្នាយកដុំថ្មដុំឥដ្ឋវាយស្ទើរខ្ទេចរថយន្ដទាំងស្រុង ហើយពេលនោះសំណាងល្អដែលម្ចាស់រថយន្ដរត់គេចខ្លួនចូលក្នុងហាងខារ៉ាអូខេដែលនៅក្បែរនោះទើបផុតពីគ្រោះថ្នាក់កុំអីមិនដឹងយ៉ាងណាយ៉ាងណីនោះទេ ។

ក្រោយមកទើបកម្លាំងសមត្ថកិច្ចចុះទៅរំដោះជនបង្កចេញពីកន្លែងកើតហេតុយកទៅសួរនាំនៅអធិការដ្ឋាននគរបាលខណ្ឌទួលគោក រីឯរថយន្ដកម្លាំងជំនាញចុះធ្វើការវាស់វែងស្ទូចយកទៅរក្សាទុក ហើយឃាត់ខ្លួនអ្នកបើកបរ យកទៅការិយាល័យចរាចរណ៍ជើងគោករាជធានីភ្នំពេញរងចាំដោះស្រាយតាមផ្លូវច្បាប់ ៕