ភ្នំពេញ: ហេតុការណ៍ភ្ញាក់ផ្អើលយ៉ាងខ្លាំងមួយបានកើតឡើង បន្ទាប់ពីស្ត្រីមានផ្ទៃពោះគ្រប់ខែម្នាក់ ដែលមានសុខភាពល្អប្រសើររហូតមកទាំងម្តាយនិងកូន បានចូលមកសម្រាក ដើម្បីត្រៀមសម្រាលនៅក្នុងមន្ទីរពេទ្យជប៉ុន តែអ្វីដែលគួរឲ្យតុកស្លុតនោះ ដោយសារតែការធ្វេសប្រហែសរបស់ក្រុមគ្រូពេទ្យ ក៏បណ្តាលឲ្យម្តាយនិងកូនក្នុងពោះស្លាប់បាត់បង់ជីវិតយ៉ាងអាណោចអាធ័ម ចោលប្តីនិងកូនប្រុស២នាក់។

ហេតុការណ៍នេះបានកើតឡើងកាលពីវេលាម៉ោងប្រមាណ៧យប់ថ្ងៃទី២៨ ខែឧសភា ឆ្នាំ២០១៧ ស្ថិតនៅក្នុងមន្ទីរជប៉ុន ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មានបានឲ្យដឹងថា ស្រ្តីរងគ្រោះដែលស្លាប់ទាំងម្តាយនិងកូនខាងលើនេះ មានឈ្មោះ ឈៀ សារិន អាយុ៣០ឆ្នាំ មុខរបរជាកម្មការិនីរោងចក្រម្ដុំអង្គស្នួល។ ចំណែកបុរសជាប្តីឈ្មោះ ជូ ភារ៉ា អាយុ៣៤ឆ្នាំ មុខរបរការងារសហជីព។ អ្នកទាំង២ ស្នាក់នៅភូមិក្រាំងម្កាក់ ឃុំត្រពាំងស្វាយ ស្រុកអង្គស្នួល ខេត្តកណ្ដាល ដោយមានកូនប្រុស២នាក់ ម្នាក់អាយុ១០ឆ្នាំ និងម្នាក់ទៀតអាយុ៨ឆ្នាំ។

បើតាមសម្ដីឪពុករបស់ស្រ្តីរងគ្រោះ និងបុរសជាប្តី បានឲ្យដឹងថា ស្ត្រីរងគ្រោះគឺពុំមានអាការ:អ្វីធ្ងន់ធ្ងន់នោះទេ ដោយសារតែជិតដល់ថ្ងៃសម្រាលកូន ទើបក្រុមគ្រួសារគាត់ បាននាំស្ត្រីជាប្រពន្ធមកសម្រាកនៅមន្ទីរពេទ្យជប៉ុន ដើម្បីត្រៀមសម្រាលកូនតាំងថ្ងៃម្សិលមិញ។

បុរសជាប្ដីបានលើកឡើងថា ប្រពន្ធនិងកូនរបស់គាត់ដែលបានស្លាប់ទាំង២នាក់នៅក្នុងមន្ទីរពេទ្យ គឺដោយសារការខ្វះការយកចិត្តទុកដាក់ពីក្រុមគ្រូពេទ្យនៅក្នុងមន្ទីរពេទ្យនេះ។

តែទោះបីជាយ៉ាង នេះគ្រាន់តែជាការលើកឡើងតែម្ខាងរបស់ភាគីរងគ្រោះ។ ចំណែកខាងពេទ្យវិញ មិនទាន់អាចសុំការបំភ្លឺពីប្រធានមន្ទីរពេទ្យជប៉ុនពាក់ព័ន្ធនិងករណីនេះបានឡើយ។

បច្ចុប្បន្នសាកសពជនរងគ្រោះត្រូវបានគេយកចេញមកខាងក្រៅទុកនៅសាលតម្កល់សព រង់ចាំសមត្ថកិច្ចជំនាញមកធ្វើកោសល្យវិច័យផងដែរ៕