ភ្នំពេញៈ បុរសម្នាក់ ជិះម៉ូតូម៉ាក Address មួយគ្រឿង បត់ពីមុខរថយន្តម៉ាក VISTO ដែលធ្វើដំណើរស្របទិសគ្នា ចាប់ហ្វ្រាំងមិនទាន់ ក៏ជ្រុលបុកពីក្រោយម៉ូតូរបស់គាត់ បណ្តាលឲ្យដួលបោកទៅនឹងថ្នល់ រងរបួសបន្តិចបន្តួច តែសំណាងមិនល្អ ក៏បាត់ទូរសព្ទអស់២គ្រឿង តម្លៃជាង៤០០ដុល្លារ។

ហេតុការណ៍នេះបានកើតឡើងកាលពីវេលាម៉ោង១ និង១០នាទី រំលងអធ្រាត្រ ឈានចូលថ្ងៃទី២៩ ខែឧសភា ឆ្នាំ២០១៧ ស្ថិតនៅតាមបណ្ដោយផ្លូវម៉ៅសេទុង ចំណុចផ្លូវបែកជា៤ ស្តុបផ្សារដើមគ ក្នុងសង្កាត់ផ្សារគ ខណ្ឌទួលគោក រាជធានីភ្នំពេញ។

តាមប្រភពព័ត៌មានពីម្ចាស់រថយន្តម៉ាក VISTO ពណ៌លឿងពាក់ស្លាកលេខ ភ្នំពេញ 2AD-6448 បានឲ្យដឹងថា មុនពេលកើតហេតុ គាត់បានបើករថយន្តតាមបណ្ដោយផ្លូវម៉ៅសេទុង ក្នុងទិសដៅពីត្បូងទៅជើងខណៈមកដល់ចំណុចកើតហេតុ ក៏បានបុកគូទម៉ូតូមួយគ្រឿង ម៉ាក Address ពណ៌ខៀវ ពាក់ស្លាកលេខ ភ្នំពេញ 1DB-3437 ជិះដោយបុរសម្នាក់ បណ្ដាលឲ្យដួលបោកទៅនឹងថ្នល់ រងការខូចខាតម៉ូតូបន្តិចបន្តួច។ គាត់ជាម្ចាស់រថយន្តក៏ឈប់ទទួលនៅកំហុសរបស់គាត់ ដោយបានសុំទោស ទៅលើជនរងគ្រោះ និងព្រមសងសំណងចំនួន២០ដុល្លារ ព្រោះរថយន្តរបស់គាត់មានបញ្ហាអាគុយហើយគាត់មិនបានបើកភ្លើងទៀត ទើបមើលអត់ឃើញ ក៏មានគ្រោះថ្នាក់បែបនេះតែម្តង តែភាគីរងគ្រោះមិនយល់ព្រមចំពោះសំណង២០ដុល្លារនោះទេ។

ចំណែកអ្នកបើកបរម៉ូតូវិញ បានបញ្ជាក់ថា ហេតុការណ៍នេះគាត់បានបាត់ទូរសព្ទអស់២គ្រឿង តម្លៃជាង៤០០ដុល្លារតែប៉ុណ្ណោះ។

ក្រោយពេលកើតហេតុ ម៉ូតូនិងរថយន្តខាងលើ ត្រូវបានសមត្ថកិច្ចជំនាញចរាចរណ៍ខណ្ឌទួលគោក បានចុះមកធ្វើការវាស់វែងយកទៅរក្សារទុកនៅអធិការដ្ឋាននគរបាលខណ្ឌទួលគោក រង់ចាំភាគីទាំងសងខាងចូលខ្លួនបំភ្លឺសម្របសម្រួលតាមផ្លូវច្បាប់៕