ព័ត៌មានជាតិ

ឃាត់ខ្លួនអ្នកសម្អាងការ២នាក់ ពាក់ពន្ធ័ករណីគ្រឿងញៀន

កណ្តាល: ជនសង្ស័យចំនួន២នាក់ ត្រូវបានកម្លាំងសមត្ថកិច្ចធ្វើការចាប់ខ្លួន ពាក់ពន្ធ័នឹងករណីគ្រឿងញៀន។

ការឃាត់ខ្លួននេះធ្វើឡើងកាលពីវេលាម៉ោង៨យប់ថ្ងៃទី១៩ ខែមិថុនា ឆ្នាំ២០១៧ ស្ថិតនៅចំណុចផ្លូវលំ ភូមិរទាំង ឃុំភូមិធំ ស្រុកកៀនស្វាយ ខេត្តកណ្តាល។

សមត្ថកិច្ចបានឲ្យដឹងថា ជនសង្ស័យ២នាក់ទី១មានឈ្មោះ វ៉ែន ពេជ្រសុជាតិ ភេទ ប្រុស អាយុ២៣ឆ្នាំ ស្នាក់នៅភូមិយកបាត្រ សង្កាត់ក្បាលកោះ ខណ្ឌច្បារអំពៅ មុខរបរសម្អាងការ និងជនសង្ស័យទី២-ឈ្មោះ ស៊ុ បូរ៉ា ភេទប្រុស អាយុ២៣ឆ្នាំ
ស្នាក់នៅភូមិភូមិធំ ឃុំភូមិធំស្រុកកៀនស្វាយ ខេត្តកណ្តាល មុខរបរលក់ដូរ។

ក្នុងនោះសមត្ថកិច្ចធ្វើការដកហូតបាន ម្សៅក្រាមពណ៌សថ្លាសង្ស័យសារធាតុញៀន (ម៉ាទឹកកកIce)១កញ្ចប់តូច,ទូរសព្ទចល័ត២គ្រឿង(ម៉ាកណូគា ចុចពិល
ពណ៌ខៀវ១គ្រឿង និងម៉ាកសាំស៊ុង ចុចពិល ពណ៌ខ្មៅ១គ្រឿង,ម៉ូតូម៉ាកស្កុបពីអាយពណ៌ទឹកដោះគោ ពាក់ស្លាកលេខ ភ្នំពេញ 1CB-2084ចំនួន១គ្រឿង ។

មុននឹងឈានដល់ការឃាត់ខ្លួនបានជនសង្ស័យខាងលើ កម្លាំងប៉ុស្តិ៍នគរបាលរដ្ឋបាលភូមិធំ សហការជាមួយកម្លាំងប្រជាការពារបានចុះល្បាតនៅចំណុចភូមិរទាំង ពេលមកដល់ចំណុចកើតហេតុក៏បានជួបជនសង្ស័យកំពុងជិះម៉ូតូ ដោយមានការសង្ស័យកម្លាំងបានហៅឲ្យឈប់ត្រួតពិនិត្យរកឃើញសារធាតុញៀនមួយកញ្ចប់តូចរួចក៏បានឃាត់ខ្លួនមកប៉ុស្តិ៍ដើម្បីសួរនាំ ។

នៅចំពោះមុខសមត្ថកិច្ចជនសង្ស័យឈ្មោះ ស៊ុ បូរ៉ា បាន សារភាពថា ថ្នាំញៀន១កញ្ចប់តូច ខាងលើនេះគឺពិតជារបស់ខ្លួនបានទិញពីឈ្មោះគឹម សៀងហៃ ភេទប្រុសអាយុ១៧ឆ្នាំ មានទីលំនៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាលដើម្បីយកមកប្រើប្រាស់ ។

បច្ចុប្បន្នជនសង្ស័យទាំង២នាក់ រួមនឹងវត្ថុតាង ត្រូវបានបញ្ជូនខ្លួនទៅកាន់ អធិការដ្ឋាននគរបាលស្រុកកៀនស្វាយ ដើម្បីធ្វើការសាកសួរ និងកសាងសំណុំរឿងបន្តចាត់ការតាមផ្លូវច្បាប់បន្តទៀត៕

មតិយោបល់