ភ្នំពេញ: ហេតុការណ៍គ្រោះថ្នាក់ចរាចរណ៍ដ៏ភ្ញាក់ផ្អើលមួយបានកើតឡើង បង្កឡើងដោយរថយន្តក្រុងអ្នកភ្ញៀវទេសចររបស់ក្រុមហ៊ុន Giantibis transport បើកបរខ្វះការប្រុងប្រយត្ន័ បានជ្រុលចង្កូតបុករះរម៉កកង់បី និងម៉ូតូជាច្រើនគ្រឿងកៀបជាប់ខាងក្រោមរថយន្ត បណ្តាលឲ្យបុរសម្នាក់រងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១២និង២០នាទីយប់ឈានចូលថ្ងៃទី២១ ខែមិថុនា ឆ្នាំ២០១៧ ស្ថិតនៅចំណុចតាមបណ្តោយផ្លូវជាតិលេខ៦អា ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

បើយោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុគេបានឃើញរថយន្តក្រុង អ្នកភ្ញៀវទេសចរ របស់ក្រុមហ៊ុន Giantibis transport ពណ៌ទឹកប្រាក់ ពាក់ស្លាកលេខ ភ្នំពេញ 3C-3088 បើកបរដោយបុរសម្នាក់តាមបណ្តោយផ្លូវខាងលើ លុះបានមកដល់ចំណុចកើតហេតុ ស្រាប់តែរេចង្កូតទៅបុករះរម៉កកង់បីមួយគ្រឿងពេញទំហឹង បណ្តាលឲ្យបុរសអ្នកបើកម៉ូតូកង់បីរងរបួសធ្ងន់ រួចរថយន្តបង្កខាងលើ បានបន្តល្បឿនទៅបុកម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៣បណ្តាលឲ្យខូចខាតបន្ថែមទៀតនៅតែមិនទាន់អស់ល្បឿន ក៏បន្តជ្រុលទៅបុកម៉ូតូម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ ភ្នំពេញ 1GE-2017 បណ្តាលឲ្យដួលកៀបជាប់ក្រោមរថយន្តរងការខូចខាតស្ទើរទាំងស្រុងតែម្តង។

ក្រោយពីកើតហេតុហើយនោះ ជនរងគ្រោះដែលរងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅឯមន្ទីរពេទ្យ ចំណែកមធ្យោបាយធ្វើដំណើរខាងលើ ត្រូវបានសមត្ថកិច្ចធ្វើការវាស់វែងយកទៅរក្សាទុករង់ចាំធ្វើការដោះស្រាយគ្នាពេលក្រោយតាមផ្លូវច្បាប់បន្តទៀត៕