បាត់ដំបង: ហេតុការណ៍គ្រោះថ្នាក់ចរាចរណ៍មួយបានកើតឡើង បន្ទាប់ពីបុរសម្នាក់ ផឹកស្រវឹង ត្រឡប់មកពីហូបការគេវិញ ដួលម៉ូតូស្លាប់តែម្នាក់ឯង ។

ហេតុការណ៍នេះបានកើតឡើងកាលពីវេលាម៉ោង១២យប់ ថ្ងៃទី២០ ខែមិថុនា ឆ្នាំ២០១៧ ស្ថិតនៅចំណុចបឹងគ ភូមិឆាយរំពាត់ ឃុំកន្ទឺ២ ស្រុកបាណន់ ខេត្តបាត់ដំបង។

សមត្ថកិច្ចបានឲ្យដឹងថា ជនរងគ្រោះដែលស្លាប់ខាងលើនេះមានឈ្មោះ សោង ឆាត ភេទប្រុស អាយុ៦៣ឆ្នាំ ស្នាក់នៅផ្ទះលេខ២៩៣ ក្រុមទី៣ ភូមិព្រែកក្រូច ឃុំព្រែកនរិន្ឋ ស្រុកឯកភ្នំ ខេត្តបាត់ដំបង ជិះម៉ូតូម៉ាកICON ពាក់ស្លាកលេខភ្នំពេញ 1AX-5099 ធ្វើដំណើរត្រឡប់មកពីហូបការគេនៅអណ្តូងស្វាយ ភូមិកំប៉ង់កើត ឃុំកន្ទឺ២ ស្រុកបាណន់ លុះដល់ចំណុចកើតហេតុខាងលើ ក៏ដួលម៉ូតូខ្លួនឯង ស្លាប់តែម្តង។

បច្ចុប្បន្នសាកសពជនរងគ្រោះត្រូវបានសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារធ្វើបុណ្យតាមប្រពៃណី៕