ភ្នំពេញៈ គ្រោះថ្នាក់ចរាចរណ៍មួយបានកើតឡើង បន្ទាប់ពីរថយន្តកូរ៉េដឹកទំនិញ១គ្រឿង បើកបុករថយន្តម៉ាកឡង់គ្រីស័រ រងការខូចខាតយ៉ាងដំណំ។

ហេតុការណ៍បានកើតឡើងនៅវេលាម៉ោង៣ និង៤៥នាទីរសៀល ថ្ងៃទី ២២ ខែ មិថុនា ឆ្នាំ ២០១៧ ស្ថិតនៅខាងមុខក្រុមមេធាវី អន្តរជាតិ ខេ ធី អិល ផ្ទះលេខ ៣១បេ ផ្លូវលេខ៣៨៤ សង្កាត់ទួលស្វាយព្រៃទី១ ខណ្ឌចំការមន រាជធានីភ្នំពេញ។

សមត្ថកិច្ចបានឲ្យដឹងថា រថយន្តស៊េរីទំនើបមួយគ្រឿង ម៉ាកឡង់គ្រីស័រ ពណ៌ស ពាក់ស្លាកលេខ ភ្នំពេញ2AI-6657 ជាមេធាវី នៅការិយាល័យ ក្រុមមេធាវី អន្តរជាតិ ខេ ធី អិម បានចតរថយន្តនៅចំណុចកើតហេតុខាងលើ លុះដល់ម៉ោងកើតហេតុ មានរថយន្តបង្ក ពណ៌ខៀវ ពាក់ស្លាកលេខ ប-0896 មួយគ្រឿង បើកថយក្រោយ មិនបានមើលក្រោយ ក៏បានបុកប៉ះរថយន្ត របស់មេធាវីម្នាក់ រងការខូចខាតតែម្តង។

ក្រោយពេលកើតហេតុ ម្ចាស់រថយន្តឡង់គ្រីស័រជាមេធាវី ទារសំណង៥ពាន់ដុល្លារ តែដោះស្រាយមិនត្រូវគ្នា ហើយរថយន្តម៉ាកឡង់គ្រីស័រ គឺចតលើផ្លូវបញ្ច្រាសទិស។ បន្ទាប់ពីកើតហេតុ សមត្ថកិច្ចបានចុះទៅកន្លែងកើតហេតុ ធ្វើការវាស់វែង និងនាំយករថយន្តទាំង២គ្រឿង តែចុងក្រោយបញ្ចប់សំណងត្រឹមតែ ៩០០ដុល្លារតែប៉ុណ្ណោះ៕