កណ្តាលៈ ករណី គ្រោះថ្នាក់ចរាចរណ៍រវាងម៉ូតូ និងម៉ូតូ បណ្តាលឲ្យបុរសម្នាក់ រងរបួសធ្ងន់។
ហេតុការណ៍បានកើតឡើងនៅវេលាម៉ោង១០ និង៤៥នាទីយប់ ថ្ងៃទី២៥ ខែមិថុនា ឆ្នាំ២០១៧ នៅលើផ្លូវជាតិលេខ២ ត្រង់ចំណុច ចន្លោះ គីឡូម៉ែត្រ២៦-២៧ ស្ថិតក្នុងភូមិព្រែកអង្គុញ ឃុំសៀមរាប ស្រុកកណ្តាលស្ទឹង ខេត្តកណ្តាល។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញម៉ូតូបង្ក ម៉ាក ស្មាស ពណ៌ខ្មៅ ពាក់ស្លាកលេខ កណ្តាល1N-4878 (រត់គេចខ្លួនបាត់) ទិសដៅពីជើងទៅត្បូង លុះមកដល់កន្លែងកើតហេតុ បុកម៉ូតូរងគ្រោះពេញទំហឹង ម៉ាកស្មាស ពណ៌ខ្មៅ លាយក្រហម ពាក់ស្លាកលេខ ភ្នំពេញ1H-2915 ជិះដោយឈ្មោះ ចែម វិឆ្ឆយ័ ភេទប្រុស អាយុ៣០ឆ្នាំ ស្នាក់នៅភូមិខ្លាកូន ឃុំពត់សរ ស្រុកបាទីខេត្តតាកែវ (តាកែវមកភ្នំពេញ) ពីទិសខាងត្បូងទៅជើង បញ្រ្ចាសទិសគ្នា បណ្តាលឲ្យរងរបួសធ្ងន់ បាក់ជើងខាងឆ្វេង។ ជនរងគ្រោះ បានបញ្ជូនទៅមន្ទីរពេទ្យភ្នំពេញ។
មូលហេតុ អ្នកបើកម៉ូតូ ស្មាស់ ពណ៌ខ្មៅ មានល្បឿនលឿន ខ្វះកាប្រុងប្រយ័ត្ន ហើយមិនប្រកាន់ស្តាំបានបុកម៉ូតូជនរងគ្រោះ។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយក ម៉ូតូ២គ្រឿងបានបញ្ជូនមករក្សាទុកនៅអធិការដ្ឋានជាបណ្តោះអាសន្ន រង់ចាំការដោះស្រាយគ្នាពេលក្រោយ៕