ព័ត៌មានជាតិ

សមត្ថកិច្ចឃាត់ខ្លួនក្មេងទំនើង៦នាក់យកមកអប់រំ ករណីបង្កភាពអនាធិបតេយ្យ!

ភ្នំពេញ: កម្លាំងសមត្ថកិច្ចខណ្ឌ៧មករា ដេញតាមធ្វើការឃាត់ខ្លួនក្មេងស្ចាវមួយក្រុម ដែលធ្វើសកម្មភាព ជិះម៉ូតូដេញវាយគ្នាពេញផ្លូវ បង្កឲ្យមានការភ្ញាក់ផ្អើលយ៉ាងខ្លាំង។

ប្រតិបត្តិការនេះបានធ្វើឡើងនៅវេលាម៉ោង១០និង៤០នាទីយប់ ថ្ងែទី២៥ ខែមិថុនា ឆ្នាំ២០១៧ តាមបណ្តោយមហាវិថីព្រះសីហនុ ម្តុំផ្សារអូឡាំពិច ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។

យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញក្មេងស្ចាវមួយក្រុម មានគ្នា៦នាក់ ជិះម៉ូតូបីគ្រឿង ម៉ាក MSX ពីរគ្រឿង និងម៉ាកនិចមួយគ្រឿង បានជិះម៉ូតូដេញវ៉ៃគ្នា ជាមួយក្រុមក្មេងស្ចាវមួយក្រុមផ្សេងទៀតពេញទាំងផ្លូវ នៅតាមបណ្តោយមហាវិថីព្រះសីហនុ ក្នុងទិសដៅពីជើងទៅត្បូង បង្កឲ្យមានការភ្ញាក់ផ្អើលយ៉ាងខ្លាំងនៅតាមបណ្តោយផ្លូវ បណ្តាលឲ្យក្រុមក្មេងស្ចាវ៦នាក់ខាងលើ រងរបួសធ្ងន់ស្រាលទាំងអស់គ្នា ខណ:ពេលដែលជិះម៉ូតូដេញវាយគ្នា ដល់ម្តុំកន្លែងលក់ផ្លៃឈើ ក៏ត្រូវបានកម្លាំងសមត្ថកិច្ចល្បាតខណ្ឌ៧មករា ដេញតាមធ្វើការឃាត់ខ្លួនតែម្តងទៅ។

យោងតាមសម្តីក្មេងស្ចាវម្នាក់ក្នុងចំណោមនោះ បានបញ្ជាក់ប្រាប់ថា នៅមុនពេលកើតហេតុ ពួកគេទើបតែជិះម៉ូតូចេញមកពីកោះពេជ្រ ខណ:ពេលកំពុងតែជិះម៉ូតូលេង ក៏មានក្រុមក្មេងស្ចាវមួយក្រុមផ្សេងទៀតជិះម៉ូតូដេញតាមពីក្រោយ លុះមកដល់កន្លែងកើតហេតុ ម្តុំស្តុបផ្សារអូឡាំពិច ក្មេងស្ចាវមួយក្រុមនោះ បានយកដុំថ្ម គប់មកលើពួកគេ បណ្តាលឲ្យពួកគេរងរបួសធ្ងន់ស្រាលទាំងអស់គ្នា ភ្លាមៗនោះ ពួកគេក៏បាននាំគ្នាជិះម៉ូតូរត់គេចពីក្រុមក្មេងស្ចាវម្ខាងនោះ ទើបត្រូវបានសមត្ថកិច្ច ដេញតាមឃាត់ខ្លួនតែម្តង។

ក្រោយពេលកើតហេតុកម្លាំងសមត្ថកិច្ចបាន បញ្ចូនខ្លួនក្រុមក្មេងស្ចាវទាំង៦នាក់យកទៅអធិការដ្ឋាននគរបាលខណ្ឌ៧មករាដើម្បីសួរនាំនិងធ្វើការអប់រំ៕

មតិយោបល់